Юй ишлерча жер хакъсыз кимлеге бериледи?

Юй ишлерча неда эл мюлк бла кюреширча жер участокну льготалары болгъан адамла эмда энчи программала ишлеген республикалада неда областьлада жашагъанла алыргъа боллукъдула. Жерни хайырланыу жорукълагъа сакъ болса, аны ызы бла кесинги атынга кёчюрюрге жарарыкъды, деп айтылады КъМР-де МФЦ-ны  билдириуюнде.

Жер кодексге 2015 жылда тюрлениуле кийирилгендиле, ала юй ишлер ючюн жерни къалай алыргъа боллугъун ангылатадыла. Участокну хакъсыз алыргъа эркинлиги болгъанланы федерал эм регион даражалы къауумлары бардыла. Федерал тизмеге ма была киредиле: Россейни эмда СССР-ни Жигитлери, Махтау орденни толу кавалерлери, Россейни Урунууну Жигитлери, Социалист Урунууну Жигитлери эм Урунуу Махтауну орденини толу кавалерлери.

Регион даражада уа юй сюерча хакъсыз жер юлюшге ма была тийишлидиле:

• Жаш юйюрле, жер алыргъа заявление берген кюннге эрини неда юй бийчесини (неда толу болмагъан юйюрде аладан бирини) жыл санлары 35-ден атламагъанла;
• 18 жыллары толмагъан (очно окъуй эселе — 23 жылгъа дери) юч эм андан кёп сабийи болгъан кёп сабийли юйюрле;
• Саулукъ сакълау, билим бериу, социал жалчытыу, культура, физкультура эм спорт бёлюмледе алгъан усталыкъларына кёре урунуп тургъан специалистле;
• Сакъат сабийлеге къарагъан инсанла;
• Узакъгъа созулгъан (аланы тизмесин Россей Федерацияны Правительствосу тохташдырады) аурууланы къыйын тюрлюлеринден къыйналгъан инсанла;
• Энчи аскер операциягъа къатыша тургъан (неда алгъын къатышхан), Россей Федерацияны Жигити атны алгъан неда РФ-ни орденлери бла саугъаланнган адамла, дагъыда урушда ауушхан (ёлген) болсала — аланы юйюрлери.

Къыралдан хакъсыз жерни жангыз бир кере алыргъа боллукъду. Заявленияны МФЦ-ны офислеринде эмда жер-жерли администрацияны органларында берирге жарайды.