Солуу жерлерибизни айбатлыгъыгъын кёргюзтюрча

Бу кюнледе Нальчикде «Креативный Эльбрус» деген регионла аралы форум бардырылгъанды, ол биринчи кере къуралгъанды. 

 

Аны къууанчлы халда ачылыуундан сора презентацияла, пленар жыйылыу, ызы бла уа юйретиу кесеги болгъандыла. Юйретиу кеси да тёрт бёлюмге юлешиннгенди, алада регионну предпринимательлери экспертле бла бирге тюрлю-тюрлю башламчылыкъланы тинтгендиле. 

 

Биринчиси аш-азыкъ туризмни айнытыугъа эмда бу жаны бла билимли ишчилени табыугъа жораланнганды. «Асти Групп» биригиуню башчысы Астемир Ныров къонакъланы бу жаны бла излемлерин тынгылы толтурууну, ала бери къайтыргъа сюерча къаллай мадарла этерге боллугъуну юсюнден айтханды. Экинчи бёлюмге къатышханла регионда къаллай сейир къууумла ётдюрюрге, адамланы излемлерине кёре бирикдирирге боллугъуну юсюнден айтхандыла. Сёз ючюн, экскурсовод Ирина Ехлакова аудиоспектакльни юсю бла ара шахарыбызны тарыхы эмда айтхылыкъ жерлери бла шагъырейлендирирге жарарыгъын белгилегенди. Маданият, чыгъармачылыкъ байламлыкъланы кючлеуде, турист биригиуню башчысы Хучиналаны Алия эс бургъаныча, жангычылыкъла керекдиле. Журналист Зарина Канукова уа адабият жолоучулукъланы бардырыргъа эсгертиу этгенди.   «Нартланы жоллары» проектни башламчысы Ксаналаны Расул бусагъатда мобильный приложениялада болгъан турист жолоучулукъланы цифра майданда хайырланыуну магъанысын чертгенди. 

 

Ахырында кенгешлеге курортла эм туризм жаны бла министр Аскер Бифов да къошулгъанды. Алада сёз бизнес бла къырал органланы араларында байламлыкъла жюрютюуню, адамла бери аслам келирча этиуню мадарларыны юсюнден баргъанды.