«Исси хауаны болушлугъу эсленирчады»

Узакъ жерлеге солургъа баргъанла бек биринчи хамамны нек излейдиле? Аны юсюнден врач Алийланы Тамерлан бла ушакъ этгенбиз.

- Хамам  багъыу амалмыды?

-Хау. Саулай дунияда да исси хауаны болушлугъу бла багъыу бекден-бек жайыла барады. Бу амалны эм учузу уа – хамамды. Алай ары атланнгынчы, сизге ол жарагъанын бла къалгъанын билирге керексиз. Нек дегенде, сёз ючюн, жюреклери бла къан тамырлары ауругъанлагъа ол хата келтирликди. Ары жолоучулугъугъуз приступ бла бошалыргъа боллукъду. Алай бу жаны бла саулугъугъуз иги эсе, ол жюрекни бла къан тамырланы бютюн кючлю этерикди.

- Депрессия бек жайылгъанды, жаш адамланы араларында окъуна. Андан болушамыды хамам?

- Мугурайып туруудан дарман  иссилик  болгъанын озгъан ёмюрледе билгендиле. Алимле бусагъатда да  тинтиуле бардыргъандыла. Кеси ыразылыкълары бла талай адам ыйыкъны ичинде хамамгъа беш кюнню жюрюп тургъандыла. Къызыулукъ аланы саулукъларына къаллай хайыр келтиргени алимлени сейирге къалдыргъанды. Биринчиден,  хамамгъа дайым жюрюген адамланы барысыны да жюреклери игирек ишлеп башлагъанды. Экинчиден, тамырларында къан уюгъаны азайгъанды. Ючюнчюден, мугурайып тургъанларын къойгъандыла, кёллери кётюрюлгенди, дуниягъа жарыкъ кёзден къарап тебирегендиле.

Алимле ангылатханыча, адам къысха заманны иссиде турса, мыйысы башха тюрлю ишлеп тебирейди. Адамны жюреги жарыйды, къан тамырлары кючленедиле. Алай бла хамамгъа дайым бара туруу адамны ёмюрюн узакъ этеди.

- Иссилик кёбюулени къурутады деген оюм кертимиди?

- Европаны къыралларында, АБШ-да бла Японияда бюгюнлюкде онкология аурууланы бу амал бла тёрели халда багъадыла. Врачла къарап тургъанлай ,саусузну чархын 43-43,8 градусха дери къыздырадыла. Андан бийик температурагъа адам тёзмейди. Быллай иссиликде рак неда вирус зараны жетген клеткаланы – сёз ючюн, В эм С гепатит – кёбюсю ёледиле. Сау клеткалагъа хата тиймейди, иммунитет а быллай температураладан сора иги да кючленеди.

Бу процедураны (гипертермия) бардырыр ючюн, адамны исси сууда жатдырадыла. Ол шок алмазча эм чархына жылыуну баргъанын эсепде тутарча, анга битеулю анестезия этедиле эм ёпкелери жалгъан халда ишлерча аппаратны хайырланадыла.

-Халкъла аралы шартлагъа кёре  гипертермия ракны, вирус гепатитлени, туберкулезну, астманы, артритлени багъыуда хайырлыды, ол угъай, ВИЧ-лери болгъан саусузлагъа окъуна себеплик этеди.

- Хау, юлгюге, онкологиядан къыйналгъан 50-жыллыкъ тиширыу врачлагъа айтханына кёре, бу процедурадан сора жууукъ-ахлулары аны жашыракъ болгъанын эслеген эдиле.

Алай бла, кёпгенлени къурутханындан сора да, гипертермия саулай да чархны жашлыгъын къайтарады. Исси температура, кёпгенни  эм вирус кирген клеткаланы кюйдюргенден тышында, башха заранлы комплекслени, токсинлени да къурутады. Аланы орунларына уа жангы белокла къураладыла, алай бла чархыгъыз   жангырады, терини халы да игиге айланады.