Бадыражан ёсдюрген мюлкледе ауруула чыкъмазча

Россельхознадзорну Къабарты-Малкъарда эм Шимал Осетия-Алания Республикада Управлениясыны фитосанитар эмда урлукълагъа контроль этиу жаны бла бёлюмюню келечилери бизни регионда теплица мюлкледе хар жыл сайын бардырыучу тинтиулерин бу жол да тынгылы тамамлап чыкъгъандыла. Мониторинг Басхан эмда Чегем районлада эм уллу агрокомплекследе ётгенди; алада теплицаланы бар ёлчеми 44 гектаргъа жетеди. Бу ишни баш мураты — карантиннге тийишли, кеслери да эм биринчиден бадыражанлагъа хата салыргъа боллукъ заранлы аурууланы эмда битимлени алгъадан ачыкълауду, деп билдиргендиле ведомстводан.

Тинтиуле бардыргъан специалистле чапыракъладан, сабакъладан эмда бадыражанланы кеслеринден пробала алып, «АПК-ны ара сынам арасыны» Къабарты-Малкъарда бёлюмюню лабораториясына тинтирге бергендиле. Анда уа алада вирусланы эмда бир ненча къоркъуулу аурууланы излегендиле.

Тамамланнган ишни эсеби мюлклени къууандыргъанды: тинтилген теплицаланы бирлеринде да ауруула бла заранлы къурт-къумурсхала табылмагъандыла. Ол шарт а бизни регионну элчилерини ишлери бийик даражада болгъаныны эмда алада тирликни къоруулау мадарла тюз этилгенлерини белгисиди, дагъыда продукцияларыны таплыгъын туура этген шартды. Алыучулагъа уа ол хайырлы эмда къоркъуусузлу болгъанына шагъатлыкъ этеди.

Дайым бардырылыучу мониторинг ведомствону ишинде бек магъаналыды. Ол фитосанитар болумну контрольда тутаргъа эмда ауруула жайылып башласала, терк окъуна мадар этерге онг береди.

Управленияда белгилегенлерича, ала элчилеге теплицаланы ичинде санитар излемлеге бек сакъ болургъа, ишде жаланда тинтилген (иги) урлукъланы хайырланыргъа дайым эсгерип турадыла, бир тюрлю аурууну белгилери ачыкълансала уа, терк окъуна алагъа билдирирге чакъырадыла.

Россельхознадзорну сагъынылгъан бёлюмюнден быллай тинтиулени андан ары да бардырлыкъларын билдиргендиле. Фитосанитар къоркъуусузлукъгъа жууаплы кёзден къарау — ол республикада бай тирликни эмда тийишли бёлюмню таукел айныууну мурдоруду, дегендиле.