Адабият бир бирге жууукълашдырады

Тёбен Чегемни орта школунда «Мени Россейим, мени Ата журтум!» жарыкъ байрам ётгенди. Аны устазла, сабийле да Россейни халкъланы бирлигини жылында поэтле Къулийланы Къайсыннга бла Алим Кешоковха жоралагъандыла. Окъуучулада кьонакъда бу жол белгили назмучула бла журналистле Беппайланы Муталип, Додуланы Аскер, Шауаланы Разият, КъМР-ни Жазыучуларыны союзуну  правленини таматасы Байтуугъанланы Исмайыл болгъандыла.

Сабийле бла устазла айтхылыкъ назмучуланы чыгъармачылыкъларына жораланнган аламат адабият-музыкалы байрам хазырлагъандыла. Назмучуланы чыгъармалары башха-башха тилледе да окъулгъандыла ол ингирде. Быллай ишле ёсюп келген тёлюню жаланда адабиятны сюерге юйретип къоймайдыла, аланы бир бирни ариу кёрюрге, къайсы миллетге да багъалы ниет сезимлени кючлерге, башха миллетлени адет-тёрелерин ангыларгъа да болушадыла, деп чертгендиле ингирни къурагъанла.