«Адыг халкъ, бар къыйынлыкъланы да хорлап, алгъа таукел барады»

21 май Адыгланы (черкеслилени) эсгериуню кюнюдю. Аны бла байламлы  Къабарты-Малкъар Республиканы Башчысы Казбек Коков республиканы жамауатына чакъырыу сёзюн туура этгенди:

"Къабарты-Малкъарны хурметли жамауаты!

Багъалы жерлешлерим!

21 майда Кавказ уруш бошалгъанлы 162 жыл болады. Ол  кюн адыг халкъны тарыхында бек ачыулу кезиулеринден бирини белгисиди. Кавказ уруш, ол узакъ ёмюрде тийреле ючюн баргъан политика кюрешни хатасындан чыкъгъан, кёп адамны да жойгъан кюйсюз къазауат болгъанды. Андан къачып, адыглыланы иги кесегине тыш къыраллагъа кёчерге, киши жеринде азап чегерге тюшгенди.

Быллай кюнде биз ол къанлы урушну хатасындан ёлгенлени башыбызны энишге ийип эсгеребиз,  тарых ата журтларындан кёчерге тюшюп, киши жерлеринде ачлыкъ, жаланнгачлыкъ, учузлукъ да сынап къыйналгъанла, адамларын анда тас этгенле бла бирге бушуу этебиз.

Алай не уллу къыйынлыкъла да  бюгалмагъандыла адыг халкъны. Ауур акъыллылыгъы, жигитлиги, ниет чыныгъыулугъу, ётгюрлюгю  - битеу ол ышанла   бар  къыйынлыкъланы да  хорларгъа онг бергендиле.

Биз таматаларыбызгъа да эслиликлери, артда не боллугъун алгъадан билалгъанлары ючюн бек ыразыбыз. Ала, къадарны сынауларына да къарамай, ата-бабаларыны тарых сайлауларына кертичилей къалгъандыла. Ол а адыг халкъны Россей къыралны къауумунда ата журтларын, ана тиллерин, миллет маданиятларын, энчи адет-тёрелерин сакъларгъа эмда айнытыргъа себеплик этгенди.

Бюгюнлюкде адыглыла къыралыбызны халкъларыны бирикген юйюрюнде келир заманларын таукелленип къурайдыла, Россейни айныууна,  кючлю эмда къарыулу болуруна юлюшлерин къошадыла. 

Бирге болсакъ, биз не уллу къыйынлыкъланы да хорларыгъыбызгъа, туугъан Къабарты-Малкъарыбызны келир заманы монглу болур ючюн, Ата журтубуз а жашнар, даражасы уа ёсер ючюн, салыннган борчланы толтурлугъубузгъа ишексизме.

Республиканы битеу халкъына кийик саулукъ, жюрек ырахатлыкъ эмда монглукъ тежейме!" - деп айтылады КъМР-ни Башчысыны чакъырыу сёзюнде.