Таза суу бла сылтаусуз этерча

КъМР-ни Къурулуш эмда жашау журт-коммунал мюлк министерствосундан билдиргенлерича, бу кюнледе Нальчикде  «Жашау этерге инфраструктура»  миллет проектге кирген кирген  «Коммунал инфраструктураны жангыртыу»  федерал программагъа кёре,  Баш водозаборну эм  сууну тазалагъан станцияны да жангыртыу  ишле башланнгандыла. Ала юч жылны ичинде бардырыллыкъдыла эм этилген жумушлагъа 1,8 миллиард сом къоратыллыкъды.

Суу жыйылгъан баш объект шахарчыланы, федерал магъаналы курортну, тёгерегинде эллени, саулай алып айтханда, 17,5 мингден артыкъ  адамны ичер суу бла жалчытады.  Ол 1962 жылда ишленнгенди. Андан бери адам санына иги кесек къошулгъаны себепли, арт заманлада борчун тынгылы толтуралмайды. Аны хатасындан майдан башлап «Нальчик» курорт бла тёгерегинде элле суу жетмей къыйналадыла. Сёз ючюн, проектге кёре ол 700 минг кубометр бла жалчытыргъа керек эсе, бюгюнлюкде жаланда 70-80 минг кубометр береди. Аны бла байламлы жайда сууну график бла берирге тюшеди.  

Проект жашауда бардырылса, элле таза суу бла толусунлай жалчытыллыкъдыла. Аны бла бирге курортну айнырына себеплик этилликди. Анга кёре къонакъ юйлени, санаторийлени эм башха объектлени да санына танг кесек къошуллукъду.  

Бусагъатда подряд организация каскад халда орналгъан кёллени бир къауумунда  сары топуракъдан тазалап, ичине суу жиберирча этип бошай турады. Бир-бир жерледе ол эки метрге жетгенди. Саулай алып айтханда, Нальчик бла  Акъ-Суу черекледе  бу халда тёрт кёлню тап халгъа келтирирге тюшерикди.   Ала сууну  тазалагъанларындан сора да, басымы бла берилирча онг тапдырадыла.

Ишлени экинчи къатында специалистле суу сакълан жерлени, тазалагъан станцияны  къурулушу бла кюреширикдиле.  Графикге кёре, ишлени асламысы келир жылдан кеч къалмай тамамланырлары сакъланады.

Эсге сала айтсакъ, республикада жашагъанланы таза суу бла тынгылы жалчытыр ючюн, эки жылгъа 36  объект жангыртыллыкъды.   Аладан 15-си былтыр хайырланыргъа берилгенди. Башхалары да быйыл келир жылда хайырланыргъа берилликдиле.