Гюлле салгъандыла, шош туруп эсгергендиле

Мени экиге айланнган къарындашым Акъшаякъланы Абдуллахны жашы Дима Германияны Дуйсбург шахарында иги кесек жылдан бери жашайды. Бу кюнледе уа ол манга бир къауум сурат, видеоматериал да жибергенди. Алада Германияда эмда Голландияда  Уллу Ата журт урушда Хорламны байрамын  бюгюнлюкде жашагъанла къалай белгилегенлерини юсюнден  хапарланады.

Дима, жашлары, юй бийчеси,  немисли шуёхлары да  майны тогъузунчу кюнюнде Уллу Хорламны белгилер, къазауатда жоюлгъан  совет солдатланы хурметлер ючюн деп, иш этип Голландияны Нидерландыйде Лёсден шахарына баргъандыла. Ала шахарны тийресинде болгъан къабырлагъа къайтып, Уллу Ата журт урушну кезиуюнде жоюлгъан  белгисиз солдатны сын ташына гюлле салгъандыла, бир минутну шош сюелгендиле. Андан чыкъгъандан сора,  ол шахарны  орамларындан биринде  совет солдатла асыралгъан "Махтаулукъну совет  майданында"  орнатылгъан мемориалны  да жокълагъандыла.

-Мен таулума, юй бийчем немислиди, шуёхларым да  алай. Барыбыз да  къабырладан чыкъгъандан сора,  Голландияны   Лёсден  шахарында адам кёп айланнган майданларындан  биринде Уллу Хорламны келтирген совет солдатланы хурметине ишленнген эсгертмени къатына  келгенбиз. Бизден сора да, алайгъа бек кёп адам жыйылгъан эди. Аланы  асламысыны къолунда жууукъларыны суратлары, кёкюреклеринде уа  Георгиевский лента тагъылып эди. Барыбыз да эсгертмеге гюл къысымла  салгъандан сора, бир минутну шош сюелгенбиз, андан сора да,  иги кесекге дери алайдан кетмей, бир -бирлерибиз бла ушакъла бардырып тургъанбыз, озгъан заманланы эсгергенбиз.  Мемориалны аллына  келгенлени иги кесегини къолларында  Хорламны, Совет Союзну заманындагъы къызыл байракъланы, Россейни байрагъын да  кёрюрге боллукъ эди. Аланы араларында ёшюнлеринде майдаллары болгъан акъсакъалла, жаш адамла, тиширыула, сабийле да кёп эдиле. Жаш адамла уа: «Жашасын Уллу Хорлам!», «Хорламны кюню!» деп,  къычырып  айланнгандыла, алагъа кёп  башхала да къошулгъандыла. Алайгъа келгенлени араларында оруслула, украинлыла, немислиле, эстонлула, дагъыда башха миллетлени келечилери да бар  эдиле.

Андан сора уа барыбыз да кафеде олтуруп,  1941-1945 жыллада  Уллу Ата журт урушну кезиуюнде жоюлгъан жууукъларыбызны эсгергенбиз,-деп хапарлагъанды къарындашым  Дима.