Ауазы жюреклеге асыу эди

Къабартылы халкъ жырчы Зарамук Кардангушевни ингиринде да КъМР-ни маданият министри Мухадин Кумахов миллетлени жарсыулу  кезиулери, къууанч заманлары да жыргъа тюшгенлерин чертгенди. Жиляу-сыйыт жырла бла бирге Зарамук кёллендирген жырла да айтханды. Ол миллетини тарыхын иги билгенди, аны жырда да айтханды. 

Чегем райондан «Чегем чучхурла» ансамбльни солисти Бёзюланы Зураб Кардангушевни жырларындан бирин жырлагъанды. Ызы бла «Лячинкъая» вокал къауумну солисти Юра Тамазов да халкъ жырладан бирин айтханды. Бусагъатда

Къабарты-Малкъарны эллерини асламысында хор къауумла, жыр ансамбльле бардыла. Бу концертде да ол шарт баям эди. Арт жыллада къуруй баргъан халкъ жыр жангыдан солуу ала, тамыр жибере башлагъанды. Энди жаш адамла да къошулсала бу ишге, аламат боллукъду. 

Басхан райондан Ислам Шикабахов, КъМР-ни сыйлы артисти Азамат Беков, филармонияны солисткасы Оксана Хакулова, Аушигер элден Рамазан Бербеков, Терк райондан Ислам Шериев, Зольск райондан Арсен Гятов бла Муртаз Татарканов, Лескен райондан Адам Варквасов бла Казбек Керефов, Музыка театрны солистлери Радик Карданов бла Жаболаны Замира, Прохладна райондан Хаути Фицежев эм башхала халкъ жырны айныгъанын кёргюзтгендиле. 

Бу эки ингирни энчиликлери: малкъарлыла къабартылыланы, къабартылыла уа малкъарлыланы концертлерине къатышхандыла. Бир бирге билеклик этген – ол аламатды. Андан сора да, бир республикада жашай эсек, бир бирибизни жырларыбызны, тепсеулерибизни билирге керекбиз, сыйлы адамларыбызны да. Омар бла Зарамук республикада жашагъан битеу халкъланы да хурметлерине тийишли адамладыла.