Мектепле жангы излемлеге келиширча

КъМР-ни Жарыкъландырыу эмда илму министерствосундан билдиргенлерича,  «Жаш тёлю эм сабийле» миллет проектге кёре,  эки жылны ичинде республикада эллиден артыкъ  мектепге тынгылы ремонт этилликди.  Аланы асламысы эл жерледе орналгъанларын да энчи белгилерчады.

Къурулуш ишлени кезиуюнде мекямла жангы излемлеге келиширча - айбат эм  къууатлы да боллукъдула.  Ол санда жангы мебель эм керек оборудование бла да жалчытылынырыкъдыла.  Саулай алып айтханда, билим бери учреждениялагъа тынгылы ремонт этерча тёрт миллард сомгъа жуууукъ бёлюннгенди.

Жангыртыу ишле баргъан кезиуде сабийле башха мектеплеге жюрюрча, аланы жылы аш бла  жалчытырча да мадар этилгенди. Бир-бир школланы окъуучулары болжаллы халда  тюшден  сора жюрюрюкдюле.

Ишле тынгылы толтурулурча, жангы технологияла бла материалла хайырланырча ата-аналаны штабы  дайым кёз-къулакъ болгъанлай турлукъду.

Эсге сала айтсакъ,  былтыр  онеки школгъа, сабий садлагъа эм общежитге тынгылы ремонт этилгенди.