Жамауат жерлеге къошула барады

Алгъаракълада  «Жашау этерге инфраструктура» миллет проектге кёре, Чегем районда  жамауат жерлени игилендириу жаны бла комплексли ишле башланнгандыла.  Эм уллу эм магъаналы объектледен бирине Чегемде «Шахар жибермейди» деген проектни санаргъа боллукъду. Аны бла байламлы проект былтыр иги шахар болум къурау жаны бла битеуроссей конкурсда хорлагъанды. Паркны уллулугъу 3,5  гектаргъа жууукълашады, къурулушуна 91 миллион сом къоратыллыкъды.   

Ол тауланы, черекни, шахар тийрени, миллет энчиликлени бирге къошуп алай туура этерик парк маталлы жерди. Кеси да тюз Нальчикни жанындан келе туруп, шахаргъа кирген жерде жангы къуралгъан «Южный»  микрорайонда орналлыкъды.  Алайлада  жашагъанла мында солургъа, заманларын зауукълу ётдюрюрге, спорт бла да кюреширге сюерикдиле, деп ышанадыла проектни бардыргъанла.

Аны плитка бла жасалгъан жаяу жолчукълары, гитче кёлчюклери, спорт бла кюреширча, ойнарча майданлары, шинтиклери, кир-кипчик атарча орунлары да боллукъду. Тёгерек-башны жашиллендириуге да аслам эс буруллукъду. Аны бла байламлы мингден аслам  терекчик  орнатыллыкъды.

Бюгюнлюкде «Юг-Строй» къурулуш организацияны келечилери иги кесек  энчи техниканы кючю бла къара топуракъны кетерип,  объектни мурдорун хазырлап кюрешедиле.

Планнга кёре, парк быйыл биринчи октябрьге  хайырланыргъа берилирге керекди.

Андан сора да, быйыл сагъынылгъан проектни чеклеринде Чегем шахарны баш жанында, Лячинкъаяда эм Звёздный шахарчыкъда да жамауат жерле ишленирча эм болгъанларын да игилендирирча мадар этилликди.

Ол санда Лячинкъаяда Ногмов атлы орамгъа бурулгъан жерде гитче кёлчикни къатында жаяу жоллары, ойнаучу жерлери бла сквер къураллыкъды. Мында кече жарыкъ болурча чыракълы чыпынла да саллыкъдыла эм ахырында жашиллендирип, бютюн айбат этерикдиле.  

Звёздныйде да воркауту бла спорт майдан ишленирикди. Аны бла бирге топ ойнаучу майданны къатында саулукъну кючлерча комплекс да жарашдырыллыкъды.

Чегемде уа Ленин атлы орамны баш жанында элчиле кеслери къурагъан топ ойнаучу майданны орунуна къараучула олтургъан шинтиклери бла тынгылы стадион ишленирикди. Мында кече да топ ойнарча чыракъла саллыкъдыла эм тёгереги бла темир буруу тартыллыкъды.

Саулай алып айтханда, Чегем районда беш жылны ичинде сагъынылгъан программа бла байламлы 23 кёп фатарлы юйню арбазы эм 16 жамауат жер жангыртылгъанды неда ишленнгенди. 

Сагъынылгъан проектни чеклеринде быйыл Къабарты-Малкъарда 32 жамауат жер ишленирикди. Алай бла,  Тырныаууз, Бахсан, Нарткъала, Къашхатау шахарлада, Бабугент, Анзорей, Аргудан, Баксаненок, Огъары Жемтала, Огъары Куркужин, Герпегеж, Жангы Малкъар, Заречное, Каменномостское, Октябрьское, Псыгансу эм Янтарное элледе да  скверле бла аллеяла ишленирикдиле.