Къыйын юйюрле, жаш адамла аслам жыйылгъан жерле тинтилгендиле

КъМР-де Ич ишле министерствода «Ёлюм къайда сатылгъанын билдир» акцияны биринчи бёлюмю толтурулгъанды. Аны чеклеринде билим бериу организациялада юч мингнге жууукъ тюбешиуле бла жыйылыула бардырылгъандыла. Алагъа 65 минг окъуучу бла аланы ата-аналары къатышхандыла. 

Интернетде тинтиуле бардырылып, наркотиклени законсуз-сатыу алыу бла байламлы 19 сайт ачыкъланнганды. Аланы юслеринден шартла   Роскомнадзоргъа билдирилгендиле, бюгюнлюкде аланы ишлерине чекле салыннгандыла. 

Право низамны сакълаучула акъылбалыкъ болмагъанланы ишлери жаны бла бёлюмледе эсепде тургъан  315 юйюрде болгъандыла. Аладан 13-де сабийле наркотиклени ичгенлери ачыкъланнганды. Аланы ата-аналарына борчларын тийишлисича толтурмагъанлары ючюн 64 административ бегим чыгъарылгъанды. Таматала ууну ичгенлери бла байламлы 21 административ иш ачылгъанды.

  Наркотиклени законсуз сатыу-алыуну тыяр эмда сабийлерине къарамагъан, алагъа зорлукъ сынатхан ата-аналаны ачыкълар мурат бла 29 ангылатыу рейд бардырылгъанды. Тинтиуле жаш адамла аслам жыйылгъан жерледе, сатыу-алыу аралада, билим бериу учреждениялада, аптекалада, общежитиялада къуралгъандыла. Битеу да бирге 436 жер тинтилгенди, ол санда ингирде эмда кече.

 Акция бардырылгъан кезиуде ич ишле органлагъа, башха жууаплы ведомстволагъа наркотиклени законсуз сатыу-алыу бла байламлы 83 билдириу этилгенди, деп билдиргендиле бизге КъМР-де МВД-ны пресс-службасындан.