Къабарты-Малкъар Республиканы Башчысы К.В.Коковну Хорламны кюню бла алгъышлауу

Къабарты-Малкъар Республиканы

Башчысы К.В.Коковну Хорламны кюню бла 
А л гъ ы ш л а у у

Къабарты-Малкъарны хурметли жамауаты!
Багъалы ветеранларыбыз!
Сизни Хорламны кюню бла жюрегимден къызыу алгъышлайма!
Уллу Ата журт уруш бошалгъанлы 81 жыл озгъанды, алай анда болдурулгъан Хорламны магъанасы, сыйы да кюч ала барады. Ол, керти окъуна, бир ёмюрню  адам улуну эсинде къаллыкъ иши болгъанды. Ол себепден бизни анга хурметибиз уллуду.

Ма ол кюн ючюн ата-бабаларыбыз битеу фронтлада да къанларын-жанларын аямай жигитча сермешгендиле. Къанлы къазауатлада кеслерин аямай кюрешгендиле эмда Берлиннге дери жетип, кюйсюз душманны ууатхандыла, алай бла адам улугъа мамырлыкъны келтиргендиле.

Немис-фашист аскерни бек уллу кюйсюзлюгюн, баш кючлерин Совет Союз сынагъанын биз эсибизден кетерлик тюйюлбюз. Анга да къарамай,  гитлерчилени къанлы муратларын юзерге аны къолундан келгенди.

Бизни борчубуз – Экинчи дуния урушну юсюнден керти шартланы сакъларгъа, тарыхны терс кёргюзтюрге, нацизмни жакъларгъа, чынтты жигитлени уа атларын аманларгъа кюрешген бетсизлеге къажау къаты сюелирге.

Уллу Ата журт уруш хар юйню, хар юйюрню, хар тукъумну юслери бла ётгенди. Къабарты-Малкъарны урушха кетген 60  минг жашындан бла къызындан  40-дан асламы жигитча сермешип ёлгендиле. Республика жаланда  фронтда угъай, тылда да, къызыл аскерчилеге боеприпасла, техника, аш-азыкъ да жиберип, санаторийлерибизде къуралгъан госпитальлада жаралы солдатланы аягъы юслерине салып, Хорламгъа кесини юлюшюн къошханды.

Уллу Ата журт урушну жигитлерине ыразылыгъыбыз, хурметибиз да айтып-айтмазча уллуду. Хорлам ючюн жашауларын бергенлени барысына да баш урабыз, аланы атлары бир заманда да унутуллукъ тюйюлдюле. Арабыздан кетген ветеранларыбызгъа эмда тылда уруннганлагъа жарсыйбыз.

Тёлюлени араларында байламлыкъ сакъланады! Бюгюнлюкде Ата журтха къуллукъ этиуню, аны эркинлигин бла жалынчакъсызлыгъын къоруулауну тёрелерин энчи аскер операциягъа къатышханла андан ары намыслары бла бардырадыла. Аланы араларында Къабарты-Малкъарны кертичи жашлары да бардыла. Ала кишиликни, чыдамлыкъны эмда ниет чыныгъыулукъну юлгюсюн кёргюзтедиле. Биз ала бла ёхтемленебиз, Ата журтлары ючюн, тюзлюк ючюн жанларын берген аскерчилерибизге баш урабыз.

Бирлик кючюбюзге таянып, аскер эмда урунуу тёрелерибизге кертичилей къалып, биз жангы къоркъуулагъа бла тыйгъычлагъа тийишли жууап беребиз, Президентибиз Россей, аны деменгилилиги эмда жашнауу ючюн салгъан борчланы толтура барабыз. 

Байрам бла! Барыгъызгъа да кийик саулукъ, монглукъ эмда ахшылыкъ тежейме!
Хорламны кюню бла!