Сабанчыланы къыстау кезиулери

Бюгюнлюкде Къабарты-Малкъарны мюлклеринде жазлыкълагъа бёлюннген жерлеге урлукъ салыу къыстау барады. Ол санда тийишли ишле Зольск районда да тамамланадыла, деп билдириледи КъМР-ни Эл мюлк министерствосундан.

Саулай алып айтханда, быйыл районда жазлыкъ битимлеге 22207 гектар бёлюннгенди. Бусагъатда тийишли ишле 5990 гектарда тамамланнгандыла. Былтыр бу заман бла тенглешдиргенде, ол 2,7 кереге мажалды. 

Сабанлада мирзеулюк нартюхден - 2925, чеплеуден - 1373, арпадан - 1109, тритикаледен - 393, жазлыкъ будайдан - 100, мал ашладан - 50, картофдан - 30 эм зынтхыдан - 10 гектар себилгенди. 

Эсге сала айтсакъ, бай тирлик алырча, жаз башында тийишли ишле  агротехника болжалдан кеч къалмай тамамланыргъа керекдиле. Аны себепли сабанчыла чууакъ кюнлени тири хайырланадыла. Районну мюлкери урлукъ, отлукъ, энчи техника эм башха керек затла бла да тынгылы жалчытылыннгандыла.