Заманында тёлегенлени санына иги кесек къошулгъанды

Нальчикде жашагъанла хайырланнган электрокюч ючюн  «Россети Северный Кавказ» - «Каббалкэнерго» биригиуге 80,6 миллион сом тёлегендиле.  Былтыр бу заман бла тенглешдиргенде, ол 3,3    процентге неда 18 миллион сомгъа  кёпдю. 

 Бюгюнлюкде биригиуню Нальчикде бёлюмю ток бла  102 280 абонентни жалчытады. Аланы асламысы, неда 93,2 проценти,  болжалдан кеч къалмай, тёлерге ашыгъадыла.  Анжелика Тамазова да аладан бириди.

- Биз болжалдан кеч къалмай  тёлесек,  электрокюч бла жалчытхан биригиу  да борчун тынгылы толтураллыкъды.  Мени оюмума кёре, борч этген иги тюйюлдю.   Ол себепден    айны онбешисине дери хайырланнган ток ючюн тёлеп къутулама эм  къошакъ халда ахча къоранч этмейме,- дейди ол.

Эсге сала айтсакъ, ток бла жалчытхан компанияны бёлюмюне барыргъа онглары болмагъанла аны   телефонларында  «Свет Онлайн» приложение бла тамамларгъа боллукъдула.  Ол кимге да тап болурча амалды. Аны себеплиги бла комиссиясыз тёлерге, эсеплеген приборда ненча санагъанын жиберирге, къайсы айда къаллай бир берилгенине  квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады.

Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Токну багъасын компанияны https://gp-lc.rossetisk.ru/ сайтында «Энчи кабинетде», «Свет Онлайн» приложенияда, адамланы жумушларына къарагъан аралада тёлерге жарайды.

 «Россети Северный Кавказ»-«Каббалкэнерго» биригиуню келечилери токну къаллай бир саналгъанын айны 23-26 кюнлеринден кеч къалмай жиберирге эм тёлеулени уа айны онбешине дери этерге кереклерин эсге саладыла.

Эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха  тартырча онг барды. Аллай амаллагъа ишлерин сюдге бериу, токну хайырланалмазча чек салыу киреди. Уллу кёллюлюк этгеннге,  борчундан тышында, тазир тёлерге да тюшерикди. 

- Заманында тёлегенлени санына къошула баргъаныны баш сылтауларындан бирлерине – жамауат бла тири билдириу, ангылатыу иш бардырылгъанын, арт заманда абонентле электрон амалны   да тири хайырланнганларын санарчады,- деп  билдиредиле «Россети Северный Кавказ» - «Каббалкэнерго» биригиуде.