Токчула илму конференциягъа къатышхандыла

Кёп болмай Къабарты-Малкъар къырал аграр университетде «Энергетиканы  бийиклери: тамблагъы жангычылыкълагъа атлам» деген чакъырым бла жаш тёлю илму-практика конференция болгъанды. Анга «Каббалкэнерго» биригиуню таматасыны биринчи орунбасары эм баш инженери Алибек Яганов, «Россети Северный Кавказ» биригиуню корпоратив социал политика жаны бла баш специалисти Дарья Маркова, КъМКъАУ-ну ректору Заурби Шхагапсоев эм башхала къатышхандыла.

Эсге сала айтсакъ, кенгеш уллу кюч бла ишлеген системала жаны бла халкъла аралы советни Россейни миллет комитетини(СИГРЭ) жаш тёлю бёлюмю къурап бардырылгъанды. Аны кезиуюнде айырмалы ишле энчи саугъалагъа тийишли болгъандыла эм келир заманда илму журналда басмаланырыкъдыла.

Аны магъанасы жаш адамланы электрокюч бёлюмге эслерин бурургъа, электроэнергетика, ол санда илму-излем жаны бла кадрла, къураргъа эм жаш адамланы башламчылыкъларында билеклик этергеди.

Конференция бла бирге университетде ишчи жерлени ярмарксы да ишлегенди. Аны кезиуюнде специалистле электрокюч бла байламлы усталыкъланы юсюнден билдиргендиле эм кёп тюрлю соруугъа тынгылы жууапла да бергендиле.

- Быллай илму конференция жаш адамла бёлюмге тартынырча, жетишимле болдурурча да ахшы себеплик этеди. Биз ишибизни айнытырча, тийишли кадрла къоллу болурча профильли вузла бла дайым байламлыкъ жюрютебиз, - дегендиле ол кюн «Россети Северный Кавказ» - «Каббалкэнерго» биригиуню келечилери.  

Черекле кётюрюлюр кезиуге хазырдыла

Черекле кётюрюлюр кезиуде майдан сентябрь айгъа дери энергокюч бла жалчытхан объектлеге хата жетмезча аланы энчи контрольда тутаргъа керек болады. Бютюнда бек суу басаргъа эм ырхыла келирге къоркъуулу жерледе. Аны бла байламлы «Россети Северный Кавказ» - «Каббалкэнерго» биригиуде энчи комиссия электрокюч ызла бузулмазча, подстанцияла эм башха объектлеге да тийишли халда ишлерча комплекс халда профилактика бардырады.

Бюгюнлюкде хата жетерик объектлеге Черек эм Чегем сууланы юсю бла баргъан ток ызла саналадыла. Болсада башха къоркъуулу жерле да кёпдюле. Ол санда Черек, Басхан, Чегем, Хеу, Урван, Малка, Урух, Лескен, Баксанёнок, Гедуко, Уллу эм Гитче Золка сууулагъа жууукъ орналгъан 35 энергообъект барды.

Кёп болмай аны бла байламлы юйрениуле бу жол Басхан сууну жагъасында ётгендиле. Аны кезиуюнде Элбрус районну оператив къауумуна черек кётюрюлген 6 кВ кюч берген ток ызлагъа заран жетдирсе, аварияны кетерирге борч салыннганды. Къыйын болса да, энергетикле бирлешип, къысха заманда жумушларын тынгылы толтуралгъандыла.

- Быллай юйрениуле специалистлени сынамларын кючлеуде иги себеплик этедиле. Энергетикле къайсы тюрлю болумгъа да хазыр боладыла эм,  жунчумай, къысха заманда бузукълукъланы кетередиле, - дегенди «Каббалкэнерго» биригиуню баш инженери Алибек Яганов да.

Айырмалы уруннганланы сайлагъандыла

Кёп болмай «Россети Северный Кавказ» - «Каббалкэнерго» биригиуню электрокюч сетьлеге къараучу эмда алагъа ремонт этиучю специалистлерини араларында эришиуле бардырылгъандыла. Бу жол ала Басхан районда бёлюмню окъутуу-юйретиу тийресинде ётгендиле, деп билдиргендиле ток бла жалчытхан компаниядан.

Усталыкъларында айырмалы болгъан ат ючюн онюч къауум эришгенди. Специалистле компанияны республикада бар бёлюмлеринден келген эдиле. Ала къалай тюрлю хазыр болгъанларына, ишлерин терк эте билгенлерине, къауумлагъа киргенле бир бирлерин къалай ангылап къармашханларына энчи комиссия багъа бергенди.

Сынамлы специалистледен къуралгъан къауумла бир бирге алчылыкъны бермезге кюрешселе да эришиулени ахырында чыгъарылгъан эсеплеге кёре 427 балл алып биринчи жерге Терк районну электрокюч сетьлерини (РЭС) келечилери чыкъгъандыла. Прохладныйде бёлюм, жаланда бир баллгъа хорлатып, экинчи болгъанды, Урвандан бригада уа жети баллгъа кем жетишими бла ючюнчю жерге тийишли болгъанды.

Ызы бла комиссия беш номинацияда да алчыланы белгилегенди. Алай бла эм иги устагъа Нальчикде бёлюмню мастерин Мызыланы Алимни санагъандыла, «Айырмалы электромонтёр» атха уа Майскийден Даниил Шевченкону тийишли кёргендиле. Эришиулеге къатышханланы арасында эм сынамлы энергетикге Чегемде РЭС-ни келечиси Руслан Вороков кёрюлгенди. Аны бла бирге "Жаш энергетик" номинацияда Басхандан Хадис Пшиготыжев хорлагъанды. Айырмалы судьялыкъ этгени ючюн «Каббалкэнерго» биригиуню  производстволу планла жарашдырыу службасыны башчысы Хасан Боготов махтаугъа тийишли болгъанды.

- Ишчилени усталыкъларын кючлендириу жумушла терк-терк бардырыла турсала игиди. Ала сынам аладыла, участкалада иш къоркъуусузлу эмда къыйматлы болады, хайырланыучуланы электрокюч бла жалчытыу да кючленеди, - деп билдиргендиле «Каббалкэнерго» биригиуде.