Ахчаны ким къалай тергей биледи

Финансла билимден эмда предпринимательликден бардырылгъан битеуроссей олимпиадагъа Къабарты-Малкъардан 17 мингден артыкъ сабий къатышхандыла, деп билдиргендиле РФ-ни Банкыны бизни республикада бёлюмюнден.

Сабий къауум хыйлачыланы ачыкъларгъа, жалгъан интеллект ахчаны жюрютюу бла байламлы этген оноуланы ойларгъа юйреннгендиле, предпринимательствону жашырынлыкъларына да тюшюннгендиле. Эришиуле Учи.ру платформада 3 мартдан башлап, бу айны экинчисине дери бардырылгъандыла.

Саулай айтханда олимпиадагъа Къабарты-Малкъардан 270 чакълы билим бериу учреждение къатышханды. Эм тириле уа Нальчикден, сора Прохладна, Терк эмда Басхан районладан мектепле болгъандыла.

Битеу къыралны юсюнден айтханда уа, олимпиадада берилген ишлени 3,1 миллиондан артыкъ сабий тамамлагъандыла. Ала бегирекда ахчаны жыйыу бла байламлы соруулагъа тюз жууапларын бергендиле. Страхованияны эмда логика сагъыш этиуню юсюнден соруулада уа аз-маз къыйналгъандыла. Болсада эм иги ангылауларын 5-7 жыллыкъ сабийле эмда гитче класслагъа жюрюгенле туура этгендиле. Хар тематика бёлюмде ала, саулай айтханда, сорууланы 55 процентине тюз жууап бергендиле.

Олимпиаданы къурагъанла: Россейни Банкы, «Национальные приоритеты» АНО, Россейни Финансла министерствосу, Экономиканы айнытыу министерствосу, Учи.ру билим бериу программа. Ол кеси да «Къыйматлы эмда конкуренциягъа чыдамлы экономика» миллет проектни чеклеринде бардырылгъанды.