Миллет проектлени толтуруу бла алчыланы санында

Къабарты-Малкъар саулукъ сакълау жаны бла миллет проектлени жетишимли толтуруп, алчы регионланы тизмесине киргенди. Аны юсюнден кёп болмай Россейни Саулукъ сакълау министерствосуну коллегиясыны кенгешинде РФ-ни Правительствосуну Председателини социал политика жаны бла орунбасары Татьяна Голикова билдиргенди. 

Саулукъ жаны бла миллет проектле жетишимли толтурулгъан регионланы санына Москва, Санкт-Петербург, Севастополь, Калининград, Калуга, Мурманск, Псков, Тула эм Тюмень областьла, Мордовия, Татарстан, Къырым, Чечен, Къабарты-Малкъар республикала эм Ямало-Ненец автоном округ киредиле.

Жыйылыуда Татьяна Голикова ол жерледе къыралны инсанлары узакъ ёмюрлю болурча эм къагъанакъланы араларында ёлгенлени санын азайтырча мадарла этилгенлерин уллу жетишимледен бирине санагъанды.

Андан сора да, уллула, гитчеле да профилактика халда специалистлени ётюу, неонатал скрининг этиу, мардалагъа келишген медицина учрежденияла ишлеу, оборудование, энчи техника бла жалчытыу иги къуралгъанын да белгилегенди. 

Аны бла бирге вице-премьер миллет проектлени толтурууда медицина учрежденияланы билимли кадрла бла жалчытыугъа, регионлада саулукъ сакълау бёлюмде цифра амалланы сингдириуге аслам эс бурулургъа кереклисин айтханды. Ол санда къысха заманда инсанла цифра амалланы тири хайырланырча, телемедицин аны да айнытырча мадарла этерге тийишлисин  эсгертгенди.