Даражалы эришиулеге сайланнгандыла

Бу кюнледе Ульяновск шахарда кикбоксингден бир жолгъа эки уллу эришиу бардырылгъанды. Ала Россейни Кубогу ючюн эр кишилени бла тиширыуланы (19-40 жыл) араларында ётгендиле. Аны бла бирге жашланы, къызланы эмда юниорланы (12-18 жыл) араларында битеуроссей эришиуле да болгъандыла. Алагъа Россейни алтмыш беш субъектинден 2174 гёжеф къатышхандыла, деп билдиредиле КъМР-ни Спорт министерствосундан.

Бу эришиуледе айырмалы болгъанла андан ары кикбоксингден бардырыллыкъ дунияны биринчилигине бла чемпионатына къатышырыкъдыла. 
Къабарты-Малкъарны жыйымдыкъ къауумуна онюч адам киргенди. Алай бла Россейни Кубогун «Фулл-контакт» низамда Тамерлан Бляшев (63.5 кг) алгъанды.
Битеуроссей эришиуледе уа 17-18 жыл толгъан юниорланы араларында Жангоразланы Шамил (75 кг) бла Джамбулат Шекихачев (71 кг) хорлагъандыла. 15-16 жыл толгъан жашладан а «лоу-кик» низамда биринчи жерге Назир Зурхаев (54 кг) чыкъгъанды.

«Фулл-контактда» «кюмюшню» Тамерлан Мизов алгъанды (67 кг). Ол жаны бла 17-18-жыллыкъ юниорланы араларында Кантемир Каров (81 кг) бла Дамир Тхакахов (75 кг), 15-16-жыллыкъ жашладан а Ибрагим Карамазов (71 кг) битеуроссей эришиулени доммакъ майдаллары къоллу болгъандыла.

Эсеплеге кёре, Жангоразланы Шамил, Джамбулат Шекихачев, Назир Зурхаев бла Тамерлан Мизов быйыл майда Одинцово шахарда бардырыллыкъ Россейни биринчилигине къатышыргъа эркинлик алгъандыла.
Тамерлан Бляшев а Россейни чемпионатына сайланнганды. Ол эришиу ноябрьде Екатеринбург шахарда бардырыллыкъды.

Гёжефле Кючменланы Рустамда, Анзор Сасиковда, Айдин Саралидзеде эм Аслан бла Алан Боллоевледе жарау этедиле.