Майданнга айтхылыкъ жерлешибизни аты аталгъанды

Санкт-Петербургну сыйлы инсаны, айтхылы дирижёр Юрий Темиркановну аты Мариин театрны концерт залыны аллында майданнга аталгъанды. Аны юсюнден оноуну шахарны губернатору Александр Беглов Санкт-Петербургну Маданиятыны жылына жоралап этгенди.

«Петербургда жашагъан хар адамгъа да Юрий Темирканов – Ата журтуна, усталыгъына кертичиликни юлгюсюдю. Фахмулу дирижёрну аты ёмюрлеге сакъланырыкъды къыралыбызны шимал жанында ара шахарыбызда. 2026 жыл бизде  Санкт-Петербургну Маданиятыны жылыча белгиленеди. Бюгюн майданнга Юрий Темиркановну атын атагъаныбыз бла бизни ызыбыздан келген жаш тёлю  аллай сыйлы адамны билирине, аны аты ёмюрлюк болуруна къошумчулукъ этгенибизди», - дегенди Александр Беглов.