Экономика онгланы кёргюзтюрюкдюле

Кавказ инвестиция форум 28-30 апрельде Минеральные Воды шахарда «Минводы ЭКСПО» кёрмюч арада ётерикди. Аны къурагъан «Росконгресс» фондду. Бу ишни баш мураты Шимал Кавказда ишчи болум къайсы жанына тюрлене баргъанын кёргюзтюргеди эмда компаниялагъа партнёрла, инвесторла, жангы рынокла да табаргъа онг бериргеди. Форумгъа федерал эм регион властьланы келечилери, предприятияланы эмда банкланы таматалары, предпринимательле,  Россейден бла тыш къыралладан экспертле да къатышырыкъдыла.

Аны программасында Шимал-Кавказ федерал округну регионларыны амалларына энчи эс бурулгъанды. Сёз ючюн, Къабарты-Малкъар кесини муратларын бир ненча бёлюмде кёргюзтюрге хазырды. Республиканы Башчысы Казбек Коков форумну ишчи программасыны талай секциясына къатышыргъа умут этеди. Аны бла бирге «Губернатор бла ушакъ» да бардырыллыкъды.

КъМР-ни талай министерстволарыны келечилери уа агротуризмни айнытыуну, жер-жерледе абериле чыгъарыучулагъа себеплик этиуню юслеринден ушакълагъа эмда кеслерини ишлери жаны бла тийишли сёлешиулеге къатышырыкъдыла. Жаш тёлю жаны бла программада Нальчик курортну айнытыу эмда туристлеге сервис къурау жаны бла проектле кёргюзтюллюкдюле. Туризм бёлюмге кадрла хазырлаугъа энчи сессия жораланырыкъды. Къабарты-Малкъаргъа ол бютюнда магъаналыды, нек дегенде тау-лыжа курортлагъа эмда санаторийлеге келгенлени саны жылдан-жылгъа ёсе барады.

Ишчи программа тюрлю-тюрлю къауумлагъа жораланып къуралгъанды. Сёз ючюн, жаш тёлюню кюнюнде энди къармашып башлагъан предпринимательле сынамлы специалистледен консультацияла аллыкъдыла. Предпринимательлени кюнюнде интерактив халда лекцияла бардырыллыкъдыла. Инвестицияланы кюнюнде уа пленар жыйылыула регионланы башчыларын эм федерал власть органланы келечилерин жыярыкъдыла. Бу ишле бла бирге эм жетишимли проектлени белгилеген «Вершина» деген сыйлы саугъа къууанчлы халда берилликди. Кёрмюч майданда уа компанияла кеслерини жангы технологияларын, оборудованияларын кёргюзтюрге эм мастер-классла бардырыргъа боллукъдула.

Былтыр бу форумгъа 32 къыралдан тёрт минг чакълы адам къатышханды, анда 206 миллиард сомгъа 86 келишим этилгенди. Аны кезиуюнде 431 спикер сёлешгенди, 78 ишчи тюбешиу бардырылгъанды, басма органлада уа форумну юсюнден билдириулеге 300 миллиондан аслам кере къаралгъанды. Баш сюзюуле туризмге, промышленностьха, эл мюлкге, энергетикагъа эмда логистикагъа жораланнган эдиле.

Кавказ инвестиция форумгъа тёрели халда БРИКС-ге, ШОС-ха, ЕАЭС-ге эм СНГ-гъа кирген  къыралланы, дагъыда Малайзияны, ОАЭ-ни, Тюркню, Узбекистанны эм башхаланы келечилери да къатышыучудула. Аны къурагъанла жаланда ишчи кезиу бла чекленип къалмай, къонакълагъа жолоучулукъла эмда къууанчла, дзюдодан турнирле эмда «Бийикликде» деген чабыу, сора кавказ халкъланы маданиятларыны фестивалын да бардырадыла.