Жолла жангыртыладыла

Жаз башы кезиуде регионну жолларында аслам кесек жангыртыу ишле къыстау бардырыладыла. Бирлерине ахча «Жашаугъа инфраструктура» миллет проектни, башхаларына «Къабарты-Малкъар Республиканы транспорт инфраструктурасын тынгылы халда айнытыу» программаны чеклеринде бёлюнеди, дегендиле КъМР-ни Транспорт эмда жол мюлк министерствосунда.

Баш магъаналы объектледен бири Новопавловск – Прохладный – Моздок жолду. Ол бизни республиканы къоншу регионла бла байлайды. Кеси да къыралны мурдорлу жолларыны тизмесине киреди. Аны кёп къалмай сегиз - километрлик кесегинде ишчиле,  эски асфальтны кетерип, мурдорун таш-топуракъ къуюп кючлендиргендиле, кёпге созмай,  жангы асфальт жайып башларыкъдыла, къоркъуусузлукъ жаны бла мадар да этерикдиле.

Бу ишни кезиуюнде транспортну тохтаусуз жюрюуюн жалчытхан объектлеге уллу эс бурулады. Сёз ючюн, анда 225- метрлик кёпюр саулай регионда эм узуннга саналады. Специалистле анда тынгылы бетондан чыпынла ишлей турадыла эмда эски бурууланы кетергендиле. Ызы бла кёпюрню хар несин жик-жиги бла къурарыкъдыла. Аны себепли анга ремонт этиледи деген угъай, ол толусунлай жангыдан ишленеди дерге тийишлиди. Бу объект быйыл битерикди, анда 30 адам къармашады эмда жыйырмадан артыкъ техника хайырланылады.

Экинчи Чегемден Булунгу таба баргъан жолда тынгылы жангыртыу ишле бир ненча жыл мындан алгъа башланнган эдиле. Аланы кезиуюнде анда къадар зат этилгенди: кёпюрле, буруула, асфальт, къоркъуусузлукъ мадарла. Жолну жанларында жер кёчмезча специалистле хунала да ишлей турадыла.

Узунлугъу кёп къалмай онюч километр болгъан Черная Речка – Благовещенка жолну юсю уа быйылгъа дери жаланда зыгъыр къуюлуп аллай эди. Энди анда сыйдам асфальт боллукъду, ол кеси да къоркъуусузлукъ эмда таплыкъ жаны бла битеу шёндюгю излемлеге келиширикди.

Аны бла бирге Малка – Ингушлу улоу жолну эки участкасы шёндюгю мардалагъа келтириле турады. Кичибалыкъны ичи бла баргъан тёрт -километрлик кесегинде бордюр ташла орнатадыла, тротуарлагъа асфальт жаядыла. Сармаково элни къатында уа (7,4 километр) жангыртыу ишлеге энди хазырланып башлагъандыла.

Хамидие элде эки орамда (Кудаев эм Бориев) ишле андан ары бардырыладыла. Подряд организацияны адамлары жолну къырып, мурдорун юзмез къуюп жарашдыргъандыла, тротуарлагъа да жер хазырлагъандыла. Дагъыда чыракъла орнатыргъа амал болурча мадар этерикдиле.

Эски Черек – Жемтала – Сукан-Суу трассада жангыртыу ишле уа 2019 жылда окъуна башланнган эдиле. Бюгюнлюкде жол къурулушчула аны Псыгансу бла Эски Черек эллени ичлери бла баргъан кесегинде асфальт жайып къармаша турадыла. Нальчик – Майский жолну бир кесегинде да ишле ол чекге жетгендиле.

Андан сора да, Терк сууну юсюнде, Май бла Терк районланы бир-бирине къошхан 182 метр узунлугъу болгъан кёпюрде ишле тири бардырыладыла. Бу объект бек тири хайырланылгъан Прохладный – Эльхотово трассадады. Специалистле анда конструкцияланы жангыртып бошагъандыла, ызладан бирине эмда тротуарланы барына да асфальт жайып чыкъгъандыла.

Черек районда уа Герпегежде Бёзю улу эмда Холам орамлагъа тынгылы ремонт этиле турады. Аны узунлугъу 1,6 километр чакълы бирди, кеси да социал магъаналы объектлеге элтеди. Алай ол асыры тозурагъаны ючюн, сабийле школгъа къыйналып жете эдиле.

Шёндю жолчула аны къырып, тюзетип, таш-зыгъыр къуюп кюреше турадыла. Ызы бла эки къат асфальт жаярыкъдыла, бордюрла, буруула эмда быргъыла орнатырыкъдыла. Дагъыда кёпюрге ремонт этип, чыракъла да саллыкъдыла.

Алгъын жылладача, объектлени асламысы графикден алгъа, къурулуш-монтаж ишлени бийик качествосун сакълап, хайырланыугъа алай берилликдиле.