«Биз шуёхлабыз деген азды, биз - къарындашлабыз!»

Къабарты-Малкъарны Маданият фонду кесини 38-жыллыгъын къууанчлы халда белгилегенди. Анга аталып жыйылыу да бардырылгъанды. Анда сёлеше, маданият араны башчысы Люаза Макоева фонд къуралгъанлы къаллай ишле тамамланнганларыны юсюнден билдиргенди.

Ол айтханыча, бюгюнлюкде ол 20 миллет маданият араны бирикдиреди. Анга эрменлилени «Ахбюр», чюйютлюлени «Товуши», дюгерлилени «Ныхас», эбизелени «Риони», корейлилени «Самчели», греклилени «Эллада», татарлыланы «Мирас», месхитинли тюрклюлени «Ватан», поляклыланы «Дружба», украинлыланы «Днепро», эстонлуланы «Кодума», оруслуланы «Вече», азербайджанлыланы «Азери», белорусланы «Сябры», «Дагъыстан» биригиулери, башхала да киредиле.

Къайсы халкъны да келечилерине миллет ышанларын, тилин, адет-тёрелерин сакълауну магъанасы бек уллу болгъанын чертип, Люаза Магомедовна миллет биригиуле бла маданият арала ма аны ючюн къуралгъанларын айырып айтханды. «Алада ана тилге юйренирге, тарых бла шагъырей болургъа, тойланы, башха къууанчланы, бушууну да бирге ётдюрюрге онг барды. Маданият фонд да миллетлени бирикдириуге уллу къыйын салады. Мында болгъан тюрлю-тюрлю къууанчлы ишледе къабартылы, малкъарлы поэтлени назмуларын татарлыла, чюйютлюле, эстонлула, дагъыда башха миллетлени келечилери окъуйдула, тепсеулерибизни да уста тепсейдиле. Биз шуёхлабыз деген азды, биз - къарындашлабыз!», - деп белгилегенди ол.

Люаза Макоева маданиятны айнытыугъа къыйын салгъан  ветеранлагъа энчи эс бурулгъанын да билдиргенди. «Быйыл алагъа деп энчи стипендияла да тохташдырылгъандыла, аланы бир къауумларын урунууну ветеранларына, башхаларын да жаш адамлагъа берирге тийишли кёргенбиз», - дегенди.

Бу шартны уа ол уллу ёхтемлик бла туура этгенди: быйыл Россейни Президенти В.Путинни буйругъу бла Россейни халкъларыны бирликлерини жылыча  белгиленеди. Ары дери уа, билгенигизча, Маданиятны, Юйюрню жыллары да ётгендиле. Ала бла байламлы Маданият фондда кёп тюрлю  ишле бардырылгъандыла, бардырыладыла эмда бардырыллыкъдыла. Алагъа республиканы шахарларындан, эллеринден кёпле къатышадыла.

Жыйылыуда КъМР-ни халкъ артисткасы Наталья Гасташева, РФ-ни сыйлы артисткасы Таукенланы Галина, дагъыда башхала  сёлешгендиле эмда республиканы маданият арасы миллетлени бирикдириу, аланы адет-тёрелерин сакълау жаны бла магъаналы иш бардыргъанын чертгендиле. «Дагъыстан» маданият араны  къауумуна кирген Хаджиланы Патимат а Владимир Вороковну да атын уллу хурмет бла эсгергенди. Люаза Макоевагъа да миллетлени бирикдириуге, бир бирни адетин, тёрелерин билирча этиуге  уллу къыйын салгъаны ючюн ыспас этгенди. Украинлы маданият араны башчысы Светлана Харенко уа фондха ала биринчи къалай бла келгенлерин, мында башхала бла шуёхлукъ къалай жаратылгъаныны юсюнден айтханды.

Ахырында Искусстволаны Шимал-Кавказ институтуну студентлери  бла аны колледжинде окъугъанла уллу концерт  кёргюзтгендиле.