Жемишден бла наныкъдан танг кесек жыйылгъанды

Къабарты-Малкъар озгъан он жылны ичинде терек бахчачылыкъ бла юч алчы регионну санына киреди. Бюгюнлюкде мюлкледе жемишледен 746 минг тоннадан артыкъ алынады. Аны иги кесеги неда 500 минг чакълысы тышына сатылады.

Аны бла бирге жыл сайын кесини рекордун жангыртханлай турады. Сёз ючюн, къыралда жемишни бла наныкъны 23 процентин бизни регион ёсдюреди. Алай эсе, хар алтынчы жемиш республикада ёсгенди деп таукел айтырчады. Эсге сала айтсакъ, бусагъатда алмала къыралны элли регионуна эм тыш къыраллагъа да жибериледиле.

Бай тирлик ёсдюрюлгенине себеплик этген амалла кёпдюле - хауа болум, жерни къурамы, экология эм иш кёллю жерлешлерибиз да. 

Бусагъатда терек бахчала 29 мингден аслам гектарда ёседиле. Аны асламысы неда 24 минг гектары терк айныгъан тюрлюлерине жетеди. Терекле орнатханлары бла бирге селекциягъа да уллу магъана бериледи. Ол санда ауруулагъа бла заранлы къурт-къумурсхалагъа, осал хауа болумлагъа чыдамлы болгъан, аны бла бирге иги тирлик берген сортлары хайырланылырча мадар этиледи. 

Келир заманны юсюнден айтханда, 2030 жылгъа терек бахчаланы 30 минг гектаргъа эм тирликни да 1,2 миллион тоннагъа жетдирирге мурат барды. Алай болса, къыралны регионларында сатылгъан хар ючюнчю алма бизде ёсдюрюлген боллукъду. 
Алмала сакъланнган жерледе да хар сортха энчи хауа болум къуралады. Алай болса, кёгетле, товар кёрюмдюлерин, витаминлерин да тас этмей, бир жылдан артыкъ сакъланадыла. Бусагъатда кёгетле сакъланнган жерлеге бир жолгъа 330 минг тонна сыйынады. Болсада тёрт жылдан аны 700 минг тоннагъа жетдирир мадар этилликди, деп билдиредиле КъМР-ни Эл мюлк министерствосундан.