Тамблагъы кюннге къайгъыра

Кёп болмай КъМР-ни Саулукъ сакълау министерствосу къурап Чегемни Маданият юйюнде «Бюгюн къайгъырыу - тамбла саулукъ. Дарман салыуну бла халкъны саулугъун алгъадан тинтиуню магъанасы» деген чакъырыу бла жарыкъландырыу акция болгъанды. Анга билим бериу учрежденияланы, жамауат биригиулени келечилери эм башхала да къатышхандыла.

Эрттенликден башлап Маданият юйню арбазында диагностика бардырырча мобил комплексле ишлегендиле. Алада районла аралы больницаны специалистлери келгенлеге къарагъандыла. Алай бла шахарчыладан бла эллиледен иги кесегини саулукълары тинтилгендиле. 

Ол кюн бардырылгъан жыйылыуда КъМР-ни Саулукъ сакълау министри Рустам Калибатов адамла саулукъларына дайым эс бурургъа кереклисин, къыйын жукъгъан аурууладан эм ала салгъан зарандан сакъланыр ючюн заманында дарман салдырыргъа тийишлисин да эсгертгенди. Айтханына шагъатха юлгюле да келтиргенди.  Аны бла бирге бюгюнлюкде скрининг амал бла онкологияны башлана тургъан кезиуюнде ачыкъларгъа боллугъун да эсге салгъанды.

Ызы бла келгенлеге суратлау фильм да кёргюзтюлгенди. Анда онкологиядан ауругъанла кеслерини жашауларындан сейир хапарла айтхандыла.

Ол кюн эпидемиология, иммунология эм жукъгъан аурууладан бакъгъан специалистле чегемлиле бла ачыкъ ушакъ бардыргъандыла. Аланы жарсытхан сорууларына толу жууапла бергендиле, эсгериуле этгендиле эм дарман салыуну хайырлыгъын да ангылатхандыла.  

Эсге сала айтсакъ, КъМР-ни Башчысы Казбек Коковну башламчылыгъы бла бардырылгъан  жарыкъландырыу акцияла Зольск, Басхан, Черек, Урван, Лескен эм Прохладна районлада да ётгендиле. Келир заманда аны республиканы башха жерлеринде да бардырыллыкъдыла.