Иш бла жалчытыргъа эм къошакъ халда усталыкъ алыргъа да онгла бардыла

Кёп болмай Нальчикде онтёрт майданда  «Россейде ишлеу. Онгланы кезиую. Бюгюн бирге тамблабызны къурайбыз» деген ат    бла  ишчи жерлени битеуроссей ярмаркасы бардырылгъанды. Аладан бири Нальчикде Къырал концерт залда ётгенди. Мында промышленность, эл мюлк,   саулукъ сакълау, билим бериу, къурулуш эм башха бёлюмледе уруннган, ишчи кадрла керек болгъан   124 чакълы  предприятие бла организация  2550  мингден артыкъ вакансия бла шагъырей этгендиле.  Ол санда «Баксан-Автозапчасть», «Нальчикни бийик вольтлу  аппаратура заводу»,  «Элбрус Спиритс»,  «Газпром газораспределение Нальчик», «ВГТРК», «Чегет» эм башхала.

            Аны чеклеринде иш къоллу болургъа излегенле  организацияла бла  толуракъ шагъырейленирге  онг тапхандыла. Ол санда къаллай усталыкъ изленнгенин, айлыкъны, социал гарантияланы, усталыкъларын ёсдюрюрча программаланы юсюнден да билгендиле.  Ишчи жерледен сора да, бюгюнлюкде Социал къоруулау ара къаллай жумушланы тамамлагъанын билирге жарагъанды. Анга Урунуу жаны бла къырал инспекцияны  КъМР-де бёлюмю да къатышады.

 Ярмаркагъа келгенлени алыгъышлай, КъМР-ни Иш бла жалчытыу арасыны таматасы  Татьяна Канунникова сёлешгенди. Ол айтханга кёре, быллай магъаналы акция 2023 жылдан бери барады эм былтыр "Кадрла" деген миллет проектни бир кесеги болгъанды. КъМР-ни Урунуу эмда социал къоруулау министерствосуну урунургъа болушхан бёлюмюню таматасы  Заур Тхашугаев ярмарка районланы бла шахар округланы  барында да баргъанын белгилеп, жетишим тежегенди.   Ызы бла "Ата журтну къоруулаучулары" фондну таматасы Муаед Дадов
КъМР-ни Урунуу эмда социал къоруулау министерствосу бла келишимге кёре  Урунуу эм социал къоруулау ара бла юч жыл байламлыкъ жюрютгенлерин  эм энчи аскер операциягъа къатышхан аскерчилени иш бла жалчытырча мадар этилгенин да айтханды.

 Урунуу эм социал къоруулау министрини къуллугъун  толтургъан
Анатолий  Шетов  Татьяна Канунникова бла бирге    предприятияланы, организацияланы келечилери къатышып тюбешиуле ётдюргендиле. Аны кезиуюнде  бюгюнлюкде рынокда къаллай усталыкълагъа сурам болгъанын да билдиргендиле.

Андан сора да, Къабарты-Малкъар къырал университетде "Усталыкъланы фетивали" деген проектни кезиуюнде  тамата классланы окъуучуларына усталыкъ сайларгъа болушхандыла. 

КъМР-ни гуманитар-техника  колледжинде уа мастер-классла,  «Мени биринчи собеседованиям» деген  викторина  эм кёрмюч да къуралгъанды.  Аны бла бирге "Россейде иш" арада сакъатлагъа урунургъа болушурча  "тёгерек стол" да  болгъанды.
 Дагъыда Урунуу эм социал къоруулау араны келечилери,  предпринимательле да болушуп,   школчулагъа, студентлеге,  энчи операцигъа къатышханлагъа промышленный эм  эл мюлк предприятияланы ишлери бла толуракъ шагъырейлендирирча экскурсия бардыргъандыла. 

Ярмарканы   магъанасы иш бла жалчытхандан сора да, тийишли эсгертиуле берип, болушлукъ тапдырыргъады.  Аны бла байламлы тамата бла ишчини арасында ангылаусузлукъну кетерирча урунуу законодательствону чеклеринде тюрлю-тюрлю соруулагъа къаралады эм Социал къоруулау ара къаллай жумушланы тамамлагъанын билирге жарайды.