Терк эм тынгылы болушлукъ тапдырылырча

Кёп болмай Республикалы клиника больницада терк болушлукъ тапдыргъан службаны ишин эсеплегендиле. Алай бла озгъан тёрт айны ичинде сегиз мингден аслам  адамгъа багъылгъанды. Ол санда жолда авариялада  ачыгъанланы  араларында ёлгенлени санын - эки кереге,  инсультдан сора ауушханланы да 62 процентге азайтыргъа онг табылгъанды. Андан сора да, служба ишлеп башлагъанлы 166 чакълы къыйын операция этилгенди. Аланы  ючден бири адамны эки неда андан да кёп жери ачыгъан эм ёлюрге жетген кезиуле эдиле.

Мекямны уллулугъу 1,2 минг квадрат метрге жетеди. Мында суткагъа 150 адамгъа къараргъа онг барды. Аны себепли бригадаланы ишлери эки кереге тынч болгъанды.

 Терк болушлукъ берген служба  хирургия бёлюм орналгъан жети  къатлы эм  жюрек бла къан тамырлагъа бакъгъан  тёрт къатлы корпусну  арасында ишленнгенди эм жабыкъ коридорла бла аланы бирге къошады. Саусузланы халларына  кёре, корпусда юч бёлюм къуралгъанды: жашил, сары эм къызыл.

Биринчисинде аягъы юслеринде болгъанла жатарыкъдыла. Регистратура, сакълаучу, айырыучу, къараучу жерле да мында орналадыла. Экинчиси терк болушлукъ берген машина келтиргенлеге этилгенди. Аны да КТ, УЗИ эм башха диагностика аппаратлары да бардыла. Ючюнчюсюне уа эм къыйын саусузла тапдырыллыкъдыла. Алагъа алты жатар жер жарашдырылгъанды.   Саусузланы ёлюмден  сакъларча оборудование да хайырланыллыкъды. Ол санда диагностика, операция бардыргъан, травматология эндоскопия эм реанимация кабинетле да хазырлыкъда турадыла. Аны себепли жарыргъа керек болгъан саусузла къысха заманда тийишли специалистлени къолларына тапдырыладыла. Къыйын саусузла,  игирек болгъунчу, корпусда юч кюнню турлукъдула. Ызы бла саулукъларына кёре башха бёлюмлеге жиберилликдиле.

Эсге сала айтсакъ, терк болушлукъ берген службада къуралгъан амалланы хайыры бла ачыгъан инсаннга неда къыйын саусузгъа "алтын сагъатны" ичинде тийишли медицина болушлукъ тапдырырча мадар этиледи.  

Къабарты-Малкъар быллай медицина болушлукъ къуралгъан саулай къыралда биринчи регион болгъанын да энчи белгилерчады.