Жамауат жерлени игилендириуге - аслам эс

Жууукъ заманда «Жашау этерге инфраструктура» миллет проектге кёре, Чегем районда  жамауат жерлени игилендириу жаны бла комплексли ишле башланырыкъдыла.

Эм уллу эм магъаналы объектледен бирине Чегемде «Шахар жибермейди» деген проектни санаргъа боллукъду. Аны бла байламлы проект былтыр иги шахар болум къурау жаны бла битеуроссей конкурсда хорлагъанды. Аны уллулугъу 2,5 гектаргъа жетеди, къурулушуна 91 миллион сом къоратыллыкъды.

Ол тауланы, черекни, шахар тийрени, миллет энчиликлени бирге къошуп алай туура этерик парк маталлы жерди. Кеси да тюз Нальчикни жанындан келе туруп шахаргъа кирген жерде боллукъду. Алайлада жангы микрорайонлада жашагъанла ол жерде солургъа, заманларын зауукълу ётдюрюрге, спорт бла да кюреширге сюерикдиле, деп ышанадыла проектни къурагъанла.

Аны плитка бла жасалгъан жаяу жолчукълары, гитче кёлчюклери, спорт бла кюреширча, ойнарча майданлары боллукъду. Тёгерек-башны жашиллендириуге да аслам эс буруллукъду. Аны бла байламлы минг чакълы терекчик да орнатыллыкъды.

Андан сора да, быйыл сагъынылгъан проектни чеклеринде Чегем шахарны баш жанында, Лячинкъаяда эм Звёздный шахарчыкъда да жамауат жерле ишленирча эм болгъанларын да игилендирирча мадар этилликди.

Ол санда Лячинкъаяда Ногмов атлы орамгъа бурулгъан жерде гитче кёлчикни къатында жаяу доллары, ойнаучу жерлери бла сквер къураллыкъды. Мында кече жарыкъ болурча чыракълы чыпынла да саллыкъдыла эм ахырында жашиллендирип, бютюн айбат этерикдиле.  

Звёздныйде да воркауту бла спорт майдан ишленирикди. Аны бла бирге топ ойнаучу майданны къатында саулукъну кючлерча комплекс да жарашдырыллыкъды.

Чегемде уа Ленин атлы орамны баш жанында элчиле кеслери къурагъан топ ойнаучу майданны орунуна къараучула олтургъан шинтиклери бла тынгылы стадион ишленирикди. Мында кече да топ ойнарча чыракъла саллыкъдыла эм тёгереги бла темир буруу тартыллыкъды.

Саулай алып айтханда, Чегем районда беш жылны ичинде сагъынылгъан программа бла байламлы 23 кёп фатарлы юйню арбазы эм 16 жамауат жер жангыртылгъанды неда ишленнгенди.