Къагъанакъланы ёлюмден сакълау бла алчыланы санында

Къабарты-Малкъарны Перинатал арасында  кюн сайын иги кесек бала тууады. Сёз ючюн, республикада туугъан къагъанакъланы 70 проценти дуниягъа  мында жаратыладыла, ол санда болжалларындан алгъа туугъанланы уа 94 проценти.    Аланы жашауларын сакъларча да бар мадар этиледи. Алай бла мингден 2,5-си ёледи, ол башха кезиуледен 34,2 процентге азды. Орта эсеп бла алып айтханда, къыралда кёрюмдюден - 3,6 эм Шимал-Кавказдан да 4,4 процентге мажалды. 

Статистикагъа кёре, къагъанакъланы  кёбюсю жукъгъан аурууланы хатасындан ёледиле. Буруннгу жылда аны сылтауу бла 22 гитче ауушхан эсе, былтыр аланы саны оннга жетгенди. Аны бла бирге ауруулары бла туугъанланы эм генетикаларында тюрлениуле болгъанланы арасында ёлгенлени да азайтыргъа онг табылгъанды.  

 Башында сагъынылгъаныча, мында ауурлукълары 500 граммгъа жетмегенле кёп туудыла. Болсада арада ишлеген врачланы, медсестраланы билимлери, сынаулары да бийик болгъанларыны, тириликлерини хайырындан аллай къагъанакъчыкъла сау къаладыла. Жылны ичинде Перинатал арада ауурлукълары бек аз болуп 20-30 бала тууады. Бизни республикада аланы  80 процентини жашауларын сакъларча мадар этиледи.  Ол къыралда орта эсеп бла белгиленнген кёрюмдюден иги да мажалды.  Аны баш сылтауларындан бири ауурлукълары болгъан эм къыйналыргъа тюшген  тиширыула заманында Перинатал арагъа тапдырылгъанлары ахшы себеплик этеди. Бийик медицина технологияланы хайыры бла ананы эм баланы да саулугъуна  заран жетмезча мадар изленеди. 

Ол санда арада болжалларындан алгъа тууаргъа тюшген эм саулукъларында бир тюрлю кемчиликлери болгъан   сабийлени жашауларын сакъларча  къыйын операцияла да  бардырыладыла. Эсге сала айтсакъ, арт заманлагъа дери аллай операцияланы этерге   федерал аралагъа жиберип тургъандыла.

Эсге сала айтсакъ, былтыр Перинатал арада болжалларындан алгъа туугъан,  ауурлукълары да  бир килограммгъа жетмеген 22 сабий  жаратылгъанды.

Андан сора да, медицина учрежденияда къошакъ халда болушлукъ тапдырырча  «Аналыкъны школу» ишлейди. Мында психологла, юристле эм башха специалистле да ата-аналаны сабийни тууар кезиуюне хазырлайдыла – билимлерин эм сынамларын да кючлейдиле.   Дагъыда мында тынгылы эм къоркъуусуз  медицина болушлукъ берилирча специалистлени билимлерин ёсдюрген  компетенция ара ишлейди.

 Саулай алып айтханда, Перинатал арада жыйылгъан сынам бирси регионлада да жетишимли  хайырланыргъа  жарарыгъын энчи чертирчады.