Губула кенг жайылгъан кезиу

Быйыл къыш хауа болум тап келишгени себепли, февральны ортасындан башлап губула тириле тебирегендиле. Андан бери республиканы медицина учрежденияларына аладан ачыгъан 42 адам келгенди. Аладан 15-си акъылбалыкъ болмагъанладыла. Былтыр сагъынылгъан кезиуде къуртла 63 адам къапхандыла, ол санда 26 сабийни, деп билдиргендиле Роспотребнадзорну КъМР-де бёлюмюнден.

Эсге сала айтсакъ, бизни республика кърым геморрагия безгек (КГЛ) жайылыргъа къоркъуулу жерге саналады. Ол саулукъгъа уллу заран салгъан, бирде ёлюмге да келтирген аурууду. Кёбюсюнде губу къапхандан сора жугъады, алай къуртну къол бла эзгенде да, хата жетерге боллукъду. Андан сора да, аладан боррелиоз, энцефалит дегенча ауруула да жугъарларына къоркъуу барды. 

Къуртла кёбюсюнде бийик ёсген ханслада бла юлкюледе кечинедиле. Аладан жаныуаргъа эм адамгъа ёрлерге да тынч болады. Ала бегирек кюн салкъында эм чегет жерледе тирилирге ёчдюле. 

Заранлы къурт-къумурсхаланы къурутур ючюн, хар замандача, билим берген учрежденияланы, санаторийлени, стадионланы, паркланы, медицина организацияланы тийрелеринде эмда башха жерледе дарман чачдырылады.

Губула заран жетдирмез ючюн эм алгъа хар ким кеси сакъ болургъа керекди. Табийгъатха чыкъгъанда, санланы жалан этмезге кюрешигиз. Андан сора да, юсюн-башын, кийимлерин эм башха хапчукну да къагъаргъа-согъаргъа керекди.

Бир тюрлю сылтау бла губу къапды эсе, эм игиси аны врачха барып чыгъарсады. Кеслери мадар этгенле уа башын анда къоймазгъа кюреширге керекдиле. Жыйылгъан материалны КъМР-де Гигиена эм эпидемиология араны лабораториясына элтип, конго-кърым геморрагия безгек болгъанын бла къалгъанын тинтирге берселе иги боллукъду.

 Аны адреси: Нальчик ш., Байсолтан улу атлы орам, 33, телефону: (8662) 74-28-28.