Ёксюзле жашау журтла бла жалчытылынырча

20 апреля, 2026 - 13:33

Быйыл Къабарты-Малкъарда ёксюз эм къарар адамлары болмагъан 180 чакълы сабий жашау журтла бла жалчытылынрыкъдыла. КъМР-ни Башчысы Казбек Коковну буйругъу бла республикалы бюджетден анга 442 миллион сом бёлюннгенди неда былтырдан 2,2 кереге кёп.

Былтыр ноябрьде  республикада бир къауум категорияны жашау журтла бла жалчытыу программаны чеклеринде жашау журт алырча иги кесек шагъатлыкъ къагъыт хазыр этилгенди. Аны хайырындан быйыл жылны башындан башлап 46 инсан юй къоллу болургъа онг тапхандыла. 

Программагъа къатышханла республиканы къалайында да фатар неда юй сайларгъа эркиндиле. Анга ахча рынокда жюрюген орта багъалагъа кёре бериледи. 

Андан сора да, республиканы Башчысыны башламчылыгъы бла энди жашау журт алыргъа шагъатлыкъ къагъыт 18 жылы болгъан жаш адамгъа берилликди. Ары дери федерал законодательствогъа кёре инсаннга 23 жыл толгъунчу аллай болушлукъ алыргъа онг болмагъанды. Алай бла, жангычылыкъ жаш адам башын иги да эрттерек тутуп башларына болушурукъду.

Магометланы Сулейман.
  • 14 просмотров
Поделиться: