Жаш адамланы араларында тюз кёз къарамла къуралырча

Тырныауузда Этезланы къарындашлары  атлы 3-чю номерли школда «Биринчилени атламларыны» жыйылыулары болгъанды. Аны магъанасы районланы таматаларыны, билим бериу учрежденияланы эм жаш тёлю араланы биригип, жаш адамланы тюз ниетледе ёсдюрюуню амалларын излеуде болгъанды.

Кенгешни ишине Элбрус муниципал районну администрациясыны башчысы Отарланы Мухтар, районну жер-жерли самоуправлениясыны советини председателини орунбасары Джаппуланы Руслан, «Биринчилени атламларыны» регион бёлюмюню советини председатели Аслан Шипшев эм аны орунбасары Забакъланы Азамат, билим бериу учрежденияланы таматалары бла аланы юйретиу жаны бла кенгешчилери да къатышхандыла. 

Жыйылыуда юйретиу ишде хайырлы амалланы бирикдирген бир ызны излеуню тийишли кёргендиле. Районну жаш тёлюсюн бла сабийлерин бу къымылдауну ишине бютюн тири къатышдырыр онгланы къураргъа кереклисин черте, аланы сейирлерин къозгъарыкъ жамауат жумушланы бардырыуну тюзге санагъандыла. Дерследен тышында, къошакъ халда билим бериуню байыкъдырыргъа да келишгендиле.

- Хар сабийни да кесини чыгъармачылыкъ хунерин сынап ачыкълар онгу болургъа керекди. Аны себепли жаш адамлагъа аллай жолланы къурау бизни борчубузду, - дегенди Аслан Шипшев.