Ангылап этилген сайлау

Батырбекланы Хадисни къызы Жаннета жаш болгъанлыкъгъа, биргесине ишлегенлени, саусузланы араларында да намысы-сыйы жюрюйдю. Ол Нальчикде республикалы клиника больницаны реанимация бёлюмюнде ишлейди.

Врач усталыкъны ол бошдан сайламагъанды. Анасы Разият Кёнделенде, Тырныауузда да медсестра болуп кёп жылланы ишлегенди. Анга къарап, тогъуз классны бошагъандан сора, Жаннета Нальчикде медицина колледжге киреди. Андан сора уа Тырныаууздагъы больницаны сабий бёлюмюнде медсестра болуп ишлегенди. Алай билимин андан ары ёсдюрюр муратын а къоймагъанды. Алай бла КъМКъУ-ну медицина бёлюмюне киреди. Анда окъуй тургъанлай, аптекада да ишлейди, эрге да барады.

– Алтынчы курсда уа медицинаны къайсы жанын сайларыгъымы юсюнден сагъыш этеме, – дейди Жаннета.- Практикабызны кезиуюнде анестезиологияны, терк болушлукъ бериуню амалларын да кёргюзте эдиле. Ма ол заманда анестезиолог-реаниматолог боллугъума тюшюннгенме. Жашауну бла ёлюмню ортасында болгъан адамгъа болушлукъ этип, халин мардагъа келтириу кёллендиргенди мени ол усталыкъгъа.

  Ол аллай къыйын эмда жууаплы ишни бардыргъанлы алай кёп болмайды, алай  сынау  жыйышдырыргъа жетишгенди. Биринчи жыллары уа, сёзсюз, къайгъылы эдиле.

– Саусуз ючюн къоркъгъаным дайым биргеме эди,- деп эсгереди врач. – Дарманланы тюз бере болурмамы деп, арсарлы болсам, биргеме ишлеген сынаулу врачладан сорургъа уялмагъанма. Алай бла, аз-аздан усталыгъымы ёсдюре баргъанма. Саусузла ючюн тынгысызлыгъ а юйюме кетсем да тынчайтмагъанды мени. Телефон бла сёлешип, саусузну халын билип тургъанма. Бирде уа солуу кюнлеримде окъуна, тёзалмай, реанимациягъа баргъанма. Бюгюнлюкде да ишим, жашауум да ол халда барады,- дейди Жаннета.

Ол усталыгъын, билимин да ёсдюрюуню къайгъысын этгенлей турады. Владикавказда институтну  къызыл дипломгъа бошайды. Аны бла да чекленип къалыргъа айтмайды: усталыгъын андан ары ёсдюре, хирург болургъа сюеди. Юйде уа – баш иеси, жашы, къызы да. Насыпха, Локияланы Альберт ангылагъан адам болуп тюшгенди. Ол Жаннетге окъургъа, билимин ёсдюрюрге бир кюнде да чырмаулукъ этмегенди.

Батырбекланы тукъумдан республикада, андан тышында да атларын айтдыргъан врачла кёп чыкъгъандыла. Жаннета да аладан артха къалыргъа сюймейди. Медицинада ишин сабийлеге багъыудан башлагъан къыз, сёзсюз, аны да андан ары бардыраллыкъ эди, алай врач усталыкъны сайлагъанды.

 Реанимацияда ишни къыйынлыгъыны юсюнден айтыр кереклиси болмаз. Суткагъа отуз эки сагъатны аягъы юсюнгде турургъа тюшеди. Аны уа тиширыула угъай, эр кишиле да кючден кётюраладыла. Жаннет а, анга да къарамай, ишин андан ары бардырыргъа айтады.

– Хау, ишим тынч тюйюлдю. Кюн сайын амалсыз саусузланы, авариягъа тюшгенлени да бери келтиредиле. Болсада ишими башхагъа алышаллыкъ тюйюлме. Мени борчум саусузгъа эс тапдырыуду. Къыйналып тургъан саусуз кёзлерин ачып къараса, къууанчыбызны чеги жокъду, – дейди Жаннет.

Бир жол больницагъа уллайгъан адамны келтиредиле. Ол, эсин ташлап, кесине кёп заманны келмей тургъанды. Аны кёрген жашарыкъ сунмагъанды. «Сау кюнню бла кечени аны къатындан кетмей турдукъ. Андан сора юйюме кетеме, эки кюнден ишге къайтып келгенимде, къарт, олтуруп, ашай тура эди. Аны кёргенимде, жилямукъларым кеси алларына тёгюлгендиле. Ала къууанчлы кёз жашларым эдиле. Ма бюгече да беш къыйын саусузубуз бар эдиле. Аладан бири тап халгъа келгенди, тёртюсюню да хаталары жокъду. Олду манга ишимде уллу къууанч, – дейди Локияланы келинлери.

Жаннетагъа къыйын ишинде, баш иесинден сора да, къайын анасы, кесини анасы да уллу болушлукъ этедиле. Болсада юйге келирин а къызы, жашчыгъы да ашыгъып сакълайдыла. Бирде уа къоншулары да аллына къарайдыла. Алагъа да ол заман, жапсарыр сёз, дарман да табып, болушлукъ этерден артха турмайды.

Жаннета юй бийчени, ананы, келинни, къызны, эгечни да борчларын тынгылы толтурур ючюн къалмайды. Аны бла бирге уа аны юйюнде, ишинде да тизгинсиз болуп неда халаты чыммакъ  болмай кёрмезсе. «Кёнделенден жюрюйме ишге. Бирде кече узунуна кёзюнгю къысмай чыгъаргъа тюшеди. Юйге уа барыргъа керекди, сабийле сакълайдыла. Аны себепли машина жюрютюрге да юйреннгенме», – дейди Жаннета.

Юйде, больницада да иши кёп болгъанлыкъгъа, ол тюрлю-тюрлю конференциялагъа барыргъа да заман табады. «Бюгюнлюкде алайсыз жарамайды, нек дегенде медицина техниканы, багъыу амалланы, дарманланы да жангылары чыкъгъанлай турадыла. Сау болсун, бёлюмню тамата врачы Хасанбий Мухамедович Кетов мени бек ангылайды, ишимде болушады,  кёп затха юйретгенди. Коллективибиз да бек игиди, медсестрала да ишлерин билген адамладыла. Аллай коллективден кетеригинг келмейди», – деп, ышарады врач.