Бизнесни онгдурууну юсюнден сёлешиннгенди

«Иш кёллю Россей» жамауат организацияны Къабарты-Малкъарда бёлюмю къурагъан Жаш тёлю бизнес-школда бу кюнледе мастер-класс ётгенди. Республиканы Экономиканы айнытыу министерствосуну МСП институтлагъа себеплик этиу бёлюмню башчысы Адана Гятова аны энди ишлеп башлагъан эмда алгъадан бери къармашхан предпринимательлеге бардыргъанды.

Ары келгенлеге ол эм гитче, гитче, сора орта предприятие дегенлени закон къалай айыргъанын билдиргенди, анда ала тюшюрген файдагъа бла алада уруннганланы санына къаралгъанын да туура этгенди. Сора «социал предприятие» даражагъа кёчюп ишлерча къаллай излемле болгъанларыны юсюнден да хапарлагъанды.

Мастер-классда айтылгъаннга кёре, быйылны ал кезиуюнде Къабарты-Малкъарда 24502 гитче эмда орта предпринимательство субъект бар эди. Кеслери иш къурап къармашхан инсанланы саны уа 94,8 мингден атлагъанды. Алагъа бизни республикада ма бу структурала билеклик этедиле: предпринимательствогъа себеплик этиу ара, регионну инжиниринг арасы, социал бёлюмде инновацияланы арасы, экспортха себеплик этген ара, эл мюлк кооперацияда, сора эллилени онгдурууда компетенцияланы арасы, аз ёлчемли кредитле берген фонд, Гарантияла фонд, бизнес-инкубаторла. Аланы къайсысы не бла кюрешгенини юсюнден спикер жик жиги бла айтханды, МСП Корпорация эмда МСП.РФ платформа берген онгланы да билдиргенди.

Предпринимательлеге Эл мюлк, Курортла эм туризм, Промышленность, энергетика эм сатыу-алыу министерствола да болушадыла – хар бири кеси жанындан, кеслери бёлюмлеринден.
Бизнес бла кюрешгенле дагъыда къырал сатыу-алыу жумушлагъа къатышыргъа боллукъдула. Законда айтылгъаныча, къырал органла эм учрежденияла кеслерине керек затланы эм азындан тёртден бирин ма аладан сатып алыргъа борчлудула. Экономиканы айнытыу министерствону келечиси бу жумушну энчиликлерини юсюнден да мастер-классха келгенлеге жик жиги бла айтханды.