Жууапны къатылыгъын ангылап, сагъыш этерге керекди

Бирде полициячыла къуллукъларын толтургъан кезиуде аланы ишлерине ыразы болмагъан инсанлагъа тюбейдиле. Бир къауумла  право низамны сакълаучу органланы келечилерини законлу буйрукъларын толтурмазгъа эркин болгъан сунадыла кеслерин. Башхалары уа полициячылагъа хыны этерге, намысларын тюшюрюрге кюрешедиле. Ол угъай,  аны аманларгъа, жалгъан шартланы айтыргъа, бузукълукъ этгенди деп терслерге кюрешгенле да бардыла.

 Аллайлагъа КъМР-де МВД-ны пресс-службасы ич ишле органланы къуллукъчуларыны ишлерине чырмагъанда, аланы эркинликлерин бузгъанда, уголовный жууаплылыкъ болгъанын эсгертедиле. «РФ-ни Уголовный кодексини 318-чи статьясында белгиленнгенича, власть органланы келечисине чабыуул этгенни, анга зорлукъ сынатханны эркинлиги он жылгъа дери сыйырылыргъа боллукъду», - деп ангылатхандыла бизге ведомстводан.

 РФ-де право низамны сакълаучугъа, аскерчиге жамауат къоркъуусузлукъну, низамлыкъны сакълау жаны бла законлу борчларын толтурургъа чырмагъанла, къуллукълары ючюн дерт жетдиргенле уголовный жууап тутарыкъдыла. Право низамны сакълаучуланы юйюрлерин да сакълайды закон.

- РФ-ни Уголовный кодексини 317-чи статьясында жазылгъаныча, быллай аманлыкъ этгенни эркинлиги 12 жылдан 20  жылгъа дери сыйырылыргъа боллукъду. Бир-бир кезиуледе уа сюд аманлыкъчыны жашаууну ахырына дери тутмакъда тутаргъа деген оноуну чыгъарыргъа да боллукъду,-дегендиле бизге ведомствону пресс-службасындан.

Властьны келечисини халкъны аллында сыйын, намысын тюшюрген да жууап тутарыкъды. УК-ны 319-чу статьясында жазылгъаныча, быллай аманлыкъ этген тазир тёлерикди:  40 минг сом, неда    бузукъчуну юч айны ичинде айлыгъы, башха файдасы тенгли. Борчлу халда хакъсыз ишлеге, тюзетиу ишлеге тартылыргъа да боллукъду.

 Уголовный кодексни 128.1-чи статьясында белгиленнгенича уа, судьяны, присяжныйни, прокурорну, следовательни, дознание бардыргъанны, сюд приставны (РФ-ни УК-сыны 298.1-чи статьясы)  юслеринден ётюрюк айтхан тазир тёлерикди: беш миллион сомгъа дери. Неда сюд тазирни   инсанны юч жылны ичинде айлыгъы, башха файдасы тенгли этерге  деген оноуну чыгъарыргъа да эркинди. Андан сора да, быллай аманлыкъ этген 480 сагъатны борчлу ишлеге тартылады. 

  Билип ётюрюк айтхан а (РФ-ни УК-сыны 306-чы статьясы) беш жылны ичинде борчлу  ишлеге тартылыргъа, неда аны эркинлиги алты жылгъа сыйырылыргъа боллукъду.

Алайды да, право низамны сакълаучуну законлу ишине чырмардан алгъа, жууапны къатылыгъын  ангылап, сагъыш этерге керекди.