Жашаугъа он минг атлам

 «Миллетни саулугъуну лигасыны» Къабарты–Малкъарда бёлюмю республиканы Саулукъ сакълау министерствосу бла бирге «Жашаугъа он минг атлам» деген битеуроссей проектни  талай жылны  бардырады. Озгъан ыйых кюн да ол Нальчикде "Хар кимге саулукъ" деген чакъырыу бла ётгенди.

Бу жол акциягъа Чегем район да тири къатышханды.  Ол кюн «Жашау этерге 10 минг атлам» деген битеуроссей акция бардырылгъанды.  Саулукъларын кючлерге: власть органланы,  организацияланы  бла учрежденияланы ишчилери,   жамауат биригиулени келечилери, саулуй алып айтханда, мингден артыкъ адам чыкъгъандыла.

Ол кюн  Чегем районну ара больницасыны келечилеринден къуралгъан медицина пункт да ишлегенди. Анда  хар ким хакъсыз къан басымларын ёнчелетирге, къанларыны къурамларын тинтирге эм УЗИ- аппарат бла жарсытхан жерлерине къаратыргъа онг тапхандыла.   

Акцияны кезиуюнде анга къатышханла   Чегем шахарны 1-чи номерли мектебини къатындан  башлап «Северный» автовокзалгъа дери барып, андан ызларына къайтхандыла.

Быллай акция «Узакъёмюрлю эм тири жашау» миллет проектни бардырыугъа ахшы себеплик этеди.  Аны магъанасы-жамауат саулукълу жашаугъа эс бурурча, кюн сайын физкультура бла кюреширча, жараула бардырырча этиудю. Ол санда жаяу жюрюу кимни да къолундан келген, санланы кючлерге эм саулукъну игилендирирге болушхан амалладан бири болгъанына тюшюндюрюудю. Аны кезиуюнде адамны иммунитети игилендириледи, организм  кереклиси  тенгли кислород бла жалчытылынады, семизликден сакъланады эм жюрек-къан тамыр ауруула къозгъалмазларына себеплик этеди.