Маданиятха салгъан къыйынларына – бийик багъа

Озгъан  бараз кюн Лескен районну Озрек элиндеги маданият юйде Культурада ишлегенлени кюнюне жораланнган аламат концерт программа  кёргюзтюлгенди. Аны КъМР-ни Культура министерствосу  къурагъанды. Ары республиканы районларында, шахарларында, эллеринде культурада ишлегенлени келечилери келгендиле.

Ол къууанчлы ишни Лескен районну эм иги  артистлери , чыгъармачы коллективлери жарыкъ тепсеулери, жырлары бла ачхандыла. Къараучула фахмулу жырчыла: «Абрекле» музыкалы къауумну солисти  Астемир Насиповха, Абхазияны сыйлы артисти Зубер Еуазагъа эмда Диана Царикаевагъа  толкъун къарслары бла тюбегендиле.

Республиканы культура министри Мухадин Кумахов залда олтургъанлагъа, аланы бетинде уа культурада ишлеген хар кимге да, республиканы Башчысы Казбек Коковну атындан алгъышлау письмону окъугъанды: «Сиз тамамлагъан иш  адамны жюрегине жетген иничке искусстводу. Сиз бизге ариулукъну, илхамланыуну саугъа этесиз, тарыхыбызны сакълайсыз эмда  келир заманны кюнюне ышаныулукъ бересиз. Дайым да кюн сайын бардырып тургъан ишлеригиз, искусствогъа кертичилигигиз эмда кюн сайын бизни хар бирибизни жашауубузгъа къууанч келтиргенигиз ючюн сау болугъуз!», деп жазылады.

Ызы бла Мухадин Кумахов культурада ишлегенлени бир къауумуна КъМР-ни Культура министерствосуну грамоталарын бергенди. Аланы араларында Черек районну администрациясыны культура эм туризм бёлюмюню башчысы  Чеченланы Фатимат, КъМР-де Маданият министерствосунда  консультант  Габоланы Саният, Къулийланы Къайсынны атын жюрютген Малкъар къырал драма театрны труппасыны башчысы Жаникаланы  Салима, Кёнделен элде  Хутуйланы Ханафийни атын жюрютген  тарых-краевед музейни  башчысы  Отарланы Фаризат да бардыла.

Культурада ишлегенлени байрамлары бла  Лескен районну администрациясыны башчысы  Сафарби Инжижоков да алгъышлай, КъМР-ни культура министри Мухадин Кумаховха байрамны аланы районда бардырыуну сайлагъанына жюрек ыразылыгъын билдиргенди. «Бу иш мында бошдан бардырылмайды, нек дегенде республиканы шахарларында, эллеринде «Культура» миллет проектге тийишлилиде кёп маданият юйле ишленип, тынгылы ремонт этилип,   хайырланылыргъа бериледиле. Озрек элдеги бу мекям да анга шагъатды. Ол кеси да маданият аралы магъананы тутады, биринчи Президент Валерий Коковну атын жюрютеди»,-дегенди. Андан сора да,  район башчы республиканы оноучулары культура  заман бла бирге атларча кёп магъаналы ишле тындыргъанларын, ол шарт да кёзге туура болгъанын, бу маданият юйледе ишлерин сюйген, алагъа битеу жюреклери бла берилген адамла ишлемеселе, маданият юйлени магъаналары болмазлыкъларын да чертгенди, культурада ишлегенлени барын да байрамлары бла алгъышлагъанды, мамырлыкъ, тынчлыкъ, ырахатлыкъ, монглукъ да тежегенди. Ызы бла районда культурада  ишлеген бир къауум адамгъа  грамотала, саугъала да бергенди.

Ингирни бютюн жарыкъ, эсде къалырча этиуге кеслерини уллу юлюшлерин жырчыла Астемир Насипов, Диана Царикаева, Зубер Еуаз эмда тепсеу коллективле: «Аргудан», «Бикар», «Насып», инструментли ансамбль «Аршыдан» къошхандыла.