Энчи багъаланнган китапладан бири

1833 жылны 4 апрелинде Санкт-Петербургда А.Ф. Смирдинни китап тюкенинде Александр Сергеевич Пушкинни «Евгений Онегин» деген назму бла жазылгъан романыны толусунлай басмаланнган китабы чыкъгъанды. Анга дери бу чыгъарма энчи-энчи кесекле бла басмалана тургъанды эмда хар башы да китап окъуучулада толу сезимни къурамагъанлай, тынгысыз этгенлей тургъандыла. Смирдинни типографиясында басмаланнганды романны битеу башлары,  288 бетден къуралгъан бир томда жыйылгъанды. Бу китап окъуучулагъа чыгъарма бла биринчи кере толусунлай танышыргъа, сюжетни айныуун эмда  жигитлени халларын толусунлай кёрюрге онг бергенди.

«Евгений Онегинни» экинчи толу басмасы уа 1837 жылда, белгили поэтни кеси саулугъунда дунияны кёргенди. Бюгюнлюкде да бу китап къайсы тёлюню да энчи багъалагъан китапларындан бириди.