ГТО-ну мардаларын бергенлеге – ахча себеплик

 Республиканы Спорт министерствосундан эсгертгенлерине кёре, 2025 жылны январындан башлап «Урунуугъа бла къорууланыугъа хазырма» (ГТО) битеуроссей физкультура-спорт комплексни мардаларын бергенлеге налог вычет этиледи. 

Аны бла хайырланыр ючюн,  инсан кесини жыл сан къауумунда ГТО-ну мардаларын берирге, белги да алыргъа керекди. Белги алтын, кюмюш неда доммакъ болургъа боллукъду, аны бу жаны бла даражасына къаралмайды. Андан сора да, комплексни берген жыл диспансеризацияны да ётерге тюшерикди. Ала экиси да бир жылны ичинде толтурулмасала, вычет къабыл кёрюллюк тюйюлдю. Баш жорукъладан бири – налог вычетны алыргъа сюйген адам Россейни гражданини болургъа эмда НДФЛ-ни тёлерге керекди, кеслерин иш бла жалчытханла бу амал бла хайырланаллыкъ тюйюлдюле.

Тёлеу инсан бюджетге тёлеген ахчадан кёп болмайды, сёз ючюн, жылгъа НДФЛ халда инсандан 2 340 сом алыннган эсе, вычетни ёлчеми 1500 сомгъа жетерикди. Аны жангызда иш бла жалчытхан организацияны юсю бла алыргъа жарайды, аны ючюн мардаланы бергенигизге шагъатлыкъ этген къагъытланы бла заявленияны бухгалтериягъа элтирге керекди. Анга кёре, иш бла жалчытхан кезиулю айлыкъдан НДФЛ-ни азыракъ этерикди.