Ананы саулугъу – баланы келир жашауу

30 мартдан 5 апрельге дери РФ-ни Саулукъ сакълау министерствосу ананы бла сабийни саулукъларыны ыйыгъын бардыргъанды. Аны чеклеринде КъМР-ни Психиатрияны бла наркологияны республикалы клиника асарыны келечилери тиширыулагъа саулукълу жашауну жорукъларын эсгертедиле.

- Аналыкъ, сабийге ёшюн берген заман – эм жууаплы кезиудю. Аны ючюн тиширыула балаларыны келир жашаулары, саулукълары ючюн къайгъыра эселе, аракъыны къоркъуусуз ёлчеми, неда «женгил» тютюн болмагъанларын эсде тутаргъа керекдиле. Ичгиде, никотинде, вейпледе, наркотикледе болгъан уула  тиширыуну кесини эм  сабийни санларына заранлы ызларын къоядыла. Ананы сютюнде болгъан ууну баласыны къарыусуз санлары кётюраллыкъ тюйюлдюле,-дегендиле бизге клиниканы пресс-службасындан.

Тиширыу сабийден ауругъан кезиуде башында айта келген осал ишле бла кюрешсе, баласыны жюреги, нервалары ауруулу,  иммунитети къарыусуз боллукъларын эсинде тутаргъа  керекди. Ананы къанында ичги сабийде ызын къояды, анга медикле фетальный алкогольный синдром (ФАС) дейдиле. Ол а сабийни акъылын  бузады. Дагъыда бир тюрлю сылтаусуз, сунмай ауушхан сабийлени асламы ичгичи аналадан туугъанладыла.

- Тиширыу саулукълу болса  – сабийге андан уллу саугъа боллукъ тюйюлдю. Алай осал къылыкъланы къоялмай эсегиз, бизни клиникада болушургъа битеу онгла бардыла,-дегендиле бизге.