Умутландыргъан атламла

Кючмезланы Азретни жашы Айдар Нальчикни 8-чи номерли школунда окъуйду. Къатыш единоборствола (ММА) бла уа алты жылындан бери кюрешеди. 

Спортну бу тюрлюсюн ол бошдан сайламагъанды - эки жылдан алты жылгъа дери аны атасы  юйретгенди. Алты жылында уа «Эльбрус» спорт клубха Жантуудуланы Азаматха берген эди. Бир жылдан артыкъ заман озгъандан сора уа, Айдар Дондагъы Ростов шахарда фрифайтдан (эркин тутушуу) Россейни чемпионатында биринчи жерни алгъанды. Анда хорлагъанла дунияны чемпионатына къатышыргъа эркин эдиле, алай,  жарсыугъа, жаш ары баралмагъанды. 

Айдарны жетишимлери да жыл санына кёре къууандырадыла. Алай 2024 жылда Нальчикде битеустильли каратеден Росгвардияны Къабарты-Малкъар Республикада Управлениясыны энчи буйрукъла толтургъан  «Вершина» отрядында эмда «Эльбрус» СОБР-да къуллукъ эте, энчи аскер операцияда  борчларын толтура ёлген аскерчиле Аслан Кештовну, Къудайланы Радмирни, Ренат Калажоковну эм Альберт Геховну хурметлерине бардырылгъан республикалы эришиуде «алтыннга» тийишли болгъанды.

2025 жыл да анга жетишимли болгъанды.  Алай бла апрельде самбодан Ингушетия Республиканы Назрань шахарында «Кавказны кубогу-2024» MMA KFL клубланы араларында бардырылгъан дунияны чемпионатында  аныча ауурлукълары болгъанланы араларында биринчи жерге тийишли болгъанды. Дагъыда  къатыш единоборстволадан (ММА) Пятигорск шахарда бардырылгъан «Халкъланы шуёхлукълары» регионла аралы эришиуде биринчи жерге чыкъгъанды.

Спорт жашны окъуууна чырмау этмейди, ол аны бла жашауун байларгъа сюеди. Арт  жыл бла жарымны ичинде Айдар башха тренерде жараула этеди - Ажоланы Исмайылда эркин тутушуу бла кюрешеди. Тренер, жашны хунерлиге санап, ол уллу жетишимлеге жетеригине бек ышанады.