Жууаплылыгъы, тирилиги бла да юлгюлюдю

МЧС-ни регионда бёлюмюнде ишлеген тиширыуланы юслеринден дайым билдире турабыз, бюгюннгю жигитибиз Кючюкланы Маликады.       
Ведомствода урунуу жолун ол 2018 жылда башлагъанды, бюгюнлюкде граждан къорууланыу эмда адамланы къоруулау жаны бла баш специалист-экспертди. Биринчи кюнледен да Малика жууаплылыгъын, бийик усталыгъын кёргюзтгенди.

Ол ишлеген бёлюмге граждан къорууланыу жаны бла къыралны политикасын бардырыргъа, чыгъаргъа къоркъуу болгъан аварияладан бла къыйын болумладан адамланы сакъларча мадарла этерге борч салынады. Аны толтурур ючюн а, инсан ишин теренинден билирге, болумгъа багъа берирча  фахмусу болургъа, тюрлене тургъан халлагъа терк амал таба билирге керекди.

- Адамланы къыйын болумладан къутхарыр ючюн, бир бирибиз бла байламлыкъда ишлерге керекбиз. Ишчи нёгерлени араларында бир бирге хурмет этиу, бир бирни ангылау да уллу магъананы тутадыла, - дейди Малика. 

Ведомствода къуллукъ этген кезиуюню ичинде Малика кёп жетишимлеге да жетгенди, МЧС-ни «Къыйыны ючюн» белгиси эм ыразылыкъ къагъыты бла саугъаланнганды. Салыннган борчланы бет жарыкълы толтургъаны, командада ишлей билгени ючюн аны сураты министерствону регионда Баш управлениясыны Сыйлы  къангасына да салыннганды. Тутхан ишине кертичилиги, тёгерегинде дунияны бютюн иги этерге талпыныуу, адамланы не тюрлю палахладан сакъларгъа да хазырлыгъы бла уа ол нёгерлерине да ахшы юлгю кёргюзтеди.