Тереклени бутакъларын къысхартыу заман жетгенди

Быйыл бизде къыш хазна сууукъ болмагъанлыкъгъа, артыкъ жылытып да къыйнамагъанды, аны себепли тереклеге хата хазна жетмегенди. Алай эсе уа, энди  хауаны аз-маз жылынып башлагъаны бла, терек бахчалагъа къарар заман жетгенди. Эм биринчи жумуш а – аланы бутакъларын кесип къысхартыуду.

Россельхозараны Къабарты-Малкъарда бёлюмюню келечилери айтханларына кёре, аланы бир-бирлерин алгъаракъдан окъуна кесерге жарай эди. Сёз ючюн, эрикни, баллини, алычаны, сора дагъыда уллу тереклени бутакъларын январьда бла февральда къыркъадыла. Жаш терекчиклеге уа сууукълада тиерге жарамайды, аланы кезиую къыш бошала тургъанда, хауаны орта температурасы жылыгъа айланса.

Баш жорукъ – бутакъланы терек «уяннгынчы» кесерге керекди. Бу амалны кесини да талай тюрлюсю барды. Бирин этгенде, терекни неда юлкюню сыфатын къурайдыла, башхасында уа, артыкъ ёсген неда эски бутакъларын кетередиле.

Биринчиден, къолгъа жютю эмда таза быхчы бла къыпты алыгъыз. Бутакъланы къышда кесиуню, жаз башында неда кюзде ишледен башхалыгъы жокъду. Терекни иги тинтип, къургъакъ, эски, жаралы эмда бошуна ёсген бутакъларын кетередиле. Ишни аны тюп жанындан башлайдыла, ызы бла ич жанына бурулгъан, къалын ёсген, бир-бирлерине тийген бутакъчыкъланы кеседиле. Эскирек бутакъланы ючден бирине къысхартадыла, уллуларын а талай къышны кезиуюнде аз-аздан кесип кетередиле, ол жерлеге да акъ бояу неда жау маталлы абери жагъадыла.

Юлкюлени да эски эм къургъакъ бутакъларын кетериучюдюле. Барын да тамырына дери кесип къояргъа жарамайды: быйыл тёртден бирин кетеригиз, келир жыл да аллай бирин. Къышда бактерияла бла вирусла тирилмегенликге, бутакъланы кесген жерлеге энчи паста жагъаргъа керекди.

Бу ишни кюзде да этедиле, алай жаз башында, кюн бек жылыннгынчы, аны кёп жаны бла хайыры барды: терек энтта да «жукълапды», вирусланы бла бактерияланы да кючлери жокъду. Алай дагъыда бек сууукъда уа аны этерге жарамайды.