Жумуртхала багъаракъ, сары жау а учузуракъ болгъандыла

Къабарты-Малкъарда быйыл февральда багъала нечик тюрленнгенлерин Росстат тохташдыргъанды. Аны тергеулерине кёре, январь бла тенглешдиргенде, товарланы бла жумушланы багъалары 1,1 процентге ёсгендиле (бегирек да аш-азыкъла - 1,92%). Ол санда тауукъ жумуртхала башхаладан эсе кёп къошхандыла – 21,59%. Алай бир жылны ичинде уа ала 2,9 процентге учуз болгъандыла.

Тахта кёгетлени бла жемишлени багъалары февральда 6,3 процентге ёсгендиле, эт а 2 процент къошханды. Биринчилери бир жылны ичинде 4,6 процентге азайгъан эселе, эт тогъуз процентден асламгъа багъаракъ болгъанды.

Статистика ведомствону тергеулерине кёре, бир жылгъа сары жау – 12,8, пиринч а 6,7 процентге учуз болгъандыла. Аш-азыкъгъа саналмагъан товарланы багъалары февральда 0,14 процентге ёсгенди, бир жылгъа уа 3,17 процент къошханды. Связь средствола (+2,26%), быстыр жууучу затла (+1,48%) багъаракъ, электроника бла техника уа бир процентге учузуракъ болгъандыла.

Берилген жумушланы багъасы февральда – 1,16, жылгъа уа 10,07 процентге ёсгендиле, тыш къыраллагъа жолоучулугъ а,  кёп къалмай,  бешден бирине багъа болгъанды. Театрлагъа билетле (+5,74%), маданият жумушла да (+30,53%) учуз болмагъандыла.

Жамауат транспортну багъасы февральда - 0,11, жылгъа уа 12,76 процентге кёбейгенди. Бытовой жумушла, ол санда чач къыркъыу ол айда - 0,06, жылгъа уа 11,96 процентге багъаракъ болгъандыла.

Саулай айтханда, февральда республикада багъала къыралда орта кёрюмдюден эсе асламыракъ къошхандыла. Алай башха жаны бла алып къарагъанда уа бизде жыллыкъ инфляция андан азыракъ болгъанды. Россейни Банкыны тергеулерине кёре, быйыл къыралда ол 4,5-5,5 процентге жетерге ушайды, келир жылда уа тёрт процентде тохташыргъа керекди.