Герпегежде жол жангыртылады

Вольный Ауулдан башлап, Къашхатаугъа дери созулгъан жолгъа тынгылы ремонт этиу башланнганды. Ахча анга регионну жол фондундан берилгенди.

Ишчиле биринчиден Герпегежни Холам орамында мадар этип башлагъандыла. Аны узунлугъу бир километрден артыкъ болады. Ол кеси да элге кирген жерден башланады. Шёндю специалистле эски асфальтны къырып кетередиле, ызы бла жолну мурдорун тынгылы жарашдырып, жангысын жаярыкъдыла. Дагъыда къоркъуусузлукъ белгиле эмда керек жерледе буруула орнатырыкъдыла, чыракъла да саллыкъдыла. Хыйеу сууда кёпюрге да тынгылы къарап, тап этерикдиле. Аны узунлугъу жыйырма метр чакълыды. Хар нени да быйыл кюзге дери тамам этерге дейдиле.

Нальчикни аэропорту: жангы рейсле эмда маршрутла

«Нальчик» халкъла аралы аэропорт кесини ишин жай кезиуде халгъа кёчюргенди - энди башха шахарлагъа учаргъа андан да тап болгъанды. Сёз ючюн, Москвада Шереметьево аэропортха самолётла кюн сайын учадыла, 1 июньда уа ары Внуково да къошуллукъду.

Санкт-Петербург: 29 майдан башлап, ыйыкъгъа юч рейс боллукъду – бараз, байрым эм ыйых кюнледе.

Къазан: 2 майдан сора ыйыкъгъа эки рейс – бараз эмда шабат кюнледе (ары дери уа орта эм ыйых кюнледе).

Сочи: ары да 2 майдан башлап бараз эмда шабат кюнледе бирер рейс боллукъду.

Башха къыраллагъа барыуну юсюнден айтханда, самолёт айгъа юч кере Кувейт — Медина маршрутда учарыкъды. Дагъыда Тюркге (Стамбулгъа эмда Анталиягъа) рейсле ачаргъа умут барды. Ол жанларына солургъа неда иш бла барыргъа сюйгенлеге женгилирек боллукъду.

Эс буругъуз: жайда рейслеге сурам уллуракъ болуучуду, аны ючюн билетлени аллындан окъуна алыргъа кюрешигиз.

Бахчалада жаз башы ишле башланнгандыла

Жылыу келгени бла республикада элчиле эмда эл мюлк предприятияла жангы бахчала орнатып башлагъандыла — бу кезиуде, эм азындан, 1000 гектар чакълы жерде жемиш терекле эмда наныкъ юлкюле салыргъа умут этедиле. Ол тийреледе уа ары дери эски бахчала болгъандыла. Саулай айтханда, бюгюнлюкде Къабарты-Малкъарда быллай бахчала кёп къалмай 30 минг гектарны аладыла — Ол Шимал Кавказда эм бийик кёрюмдюледен бириди.

Терек орнатыу бла бирге энди боллукъ тирликни къоруулау иш да тири барады: элчиле бахчалагъа дарман себедиле, къурт-къумурсхаланы, заранлы жууаланы эмда ауруула къозгъагъан затланы къырадыла, ала артда да чыкъмазча мадар этедиле. Бу жумушланы асламысын къазауат этип, терекле чагъып башлагъынчы тамамларгъа керекди.

Бюгюнлюкде терек бахчачылыкъны магъанасы бизни республикагъа уллу болгъанды. Ол саулай къыралда окъуна адамланы жемишле эмда наныкъла бла жалчытыугъа сезилирча аллай къошумчулукъ этеди.