Таза суудан къытлыкъ сынамазча

Къабарты-Малкъарда «Коммунал инфраструктураны жангыртыу» федерал проектге кёре  2025-2027 жыллада ичер суу бла жалчытхан 36  объект жангыртыллыкъды. 

Бу кюнледе  Нальчикде  баш водозаборну эм  сууну тазалагъан станцияны да жангыртыу  ишле башланнгандыла. Ала юч жылны ичинде бардырыллыкъдыла эм алагъа 1,8 миллиард сом къоратыллыкъды, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан. 

Суу жыйылгъан баш объект шахарчыланы, федерал магъаналы курортну, тёгерегинде эллени, саулай да 17,5 мингден артыкъ  адамны ичер суу бла жалчытады.  

Ол 1962 жылда ишленнгенди. Андан бери адам санына иги кесек къошулгъаны себепли, ол арт заманлада борчун тынгылы толтуралмайды. Аны хатасындан майдан башлап «Нальчик» курорт бла тёгерегинде элле суу жетмей къыйналадыла. Сёз ючюн, проектге кёре ол 700 минг кубометр бла жалчытыргъа керек эсе, бюгюнлюкде жаланда 70-80 минг кубометр береди. Аны бла байламлы жайда сууну график бла берирге тюшеди.  

Проект жашауда бардырылса, элле таза суу бла толусунлай жалчытыллыкъдыла. Аны бла бирге курортну айнырына себеплик этилликди. Анга кёре къонакъ юйлени, санаторийлени эм башха объектлени да санына танг кесек къошуллукъду.  

Эсге сала айтсакъ, республикада жашагъанланы таза суу бла тынгылы жалчытыр ючюн, эки жылгъа 20 объект ишленирикди. Аладан 15-си былтыр хайырланыргъа берилгенди. Башхалары  быйылны ахырына тамам этилликдиле.