РТРС-ге - 25 жыл

Россейни теле- эм радио бериулени сетине (РТРС) былтыр 13 августда 25 жыл толгъанды. Президентни буйругъу бла ол 2001 жылда къуралып, жер башында эм уллу цифралы телевидение эмда FM-радиовещание биригиу болгъанды.

Къабарты-Малкъарда РТРС республикада жашагъанланы кёп къалмай барын да (99,8%) цифралы телевиденияны аслам кесек каналлары бла жалчытады. Регионну телевидения сетини къауумунда 38 станция ишлейди. Ала жаланда федерал программала бла угъай, «Къабарты-Малкъар» телевиденияны бериулерин «Россия 1», «Россия 24» каналлада эмда «Россейни радиосу» радиоканалда жалчытадыла. Къараучула «1 КБР» каналны бериулерине ОТР-де РТРС-1 пакетде эмда аналог халда къараяллыкъдыла.

РТРС-ни регионда бёлюмюнде шёндю 59 адам ишлейди. Нальчикни айбатлы этген затладан бири – телебашняды. Ол кеси да 2022 жылдан башлап тюрсюнлю чыракъла бла жарытылады.

Бу предприятие 79 радиотелеараны бир производстволу-технологиялы комплексге жыйышдырып, телекоммуникация сферагъа баш магъаналы борчну тындырады. Регионланы барында да быллай связьны РТРС жалчытады. Аны иши уа къыралны къорууланыууна, къоркъуусузлугъуна, технологиялы мурдоруна энчи магъаналыды, кеси да инсанланы информация бла шагъырейленирге конституция бла берилген эркинликлерин тамамларгъа болушады.

РТРС-ни цифралы телесети Россейни битеу тийресине жайылады, анга беш мингден артыкъ станция киреди. Ала уа адамланы 98,6 процентине 20 телеканалны эмда 3 радиоканалны бериулерине къараргъа эмда тынгыларгъа онг бередиле.

Компанияны эм магъаналы объекти Останкино телебашняды, аны бийиклиги 540 метрди. Ол саулай Россейде эмда битеу Европада эм бийик мекямды. РТРС-ни технологиялы комплекси дайым жангыртылады. Предприятие телерадиосетьни Россейни жангы тийрелеринде – Донецк эмда Луганск республикалада, Запорожье эмда Херсон областьлада да айнытады. Аны инфраструктурасы жаланда бу жумушда угъай, адамланы интернет эмда мобильный связь бла жалчытыуда, къыйын болумланы юсюнден мычымай билдириуде хайырланылады. Компания связьны башха тюрлюлерин да айнытады. Ол санда «РТРС.ПЛЮС» платформаны да. Ол а Россейни алты регионунда ишлейди.

Алай бла 25 жылны ичинде РТРС шёндюгю телерадиовещание системаны мурдору болгъанды дерчады. Ол къадар инсанны тынгылы эмда тап связь бла жалчытады.