Ишлерине бийик багъа бергендиле

Тырныауузда Къулийланы Къайсын атлы маданият юйде районну медицинада ишлегенлерини эсеп  жыйылыуу болгъанды. Анда эм магъаналы соруула сюзюлгендиле. Район больницаны бла стоматология поликлиниканы озгъан жылны ичинде ишлерини жетишимлери бла кемчиликлери белгиленнгендиле. Андан сора да,  2026  жылгъа салыннган борчла эм аланы жашаугъа келтириу амалланы юслеринден да айтылгъанды. Кенгешни ишине КъМР-ни  саулукъ сакълау министрини орунбасары  Татьяна Аникушина бла Элбрус районну администрациясыны башчысы Отарланы Мухтар, районну депутатлары бла эл башчылары къатышхандыла.

Районну ара больницасыны баш врачы Тилланы Хабибуллах районну саулукъ сакълау системасыны ишини юсюнден тынгылы отчёт этгенди. Озгъан жылны жетишимлерини санында районну жамауатыны арасында диспансеризацияны бийик кёрюмдюлерин, мюлк-техника жаны бла хазнаны кючленнгенин, медицина жаны бла болушлукъ  этиуню качествосуну ёсгенин, быйылгъа салыннган умутланы жашаугъа келтириуню, саусузланы багъыуда жангы амалланы хайырланыуну да юслеринден айтханды.

Районну тишлеге бакъгъан  службасыны  озгъан жылда болдургъан кёрюмдюлерини юсюнден районну стоматология поликлиникасыны баш врачы Ногъайлыланы Мустафа сёлешгенди. Ол кесини докладында районну жамауатына ол жаны бла  тынгылы медицина болушлукъ этилгенин  черте, жангы амалланы хайырланыугъа эм врачланы профессионал усталыкъларын ёсдюрюуге уллу эс бургъанларын билдиргенди.  Кенгешни ахырында окъулгъан докладлагъа  кёре видео-сурат информациалы материаллагъа къарагъандыла.