Коммерциялы болмагъан биригиулеге – себеплик

Коммерциялы болмагъан биригиулени (НКО) советни башламчылыгъы бла республиканы Жамауат палатасында «НКО-ланы ишлерини эсеплерин электрон халда жарашдырыу. Соруула эм тыйгъычла» деген темагъа жыйылыу-семинар бардырылгъанды. Аны баш специалист-экспертле  Къарчаланы Фатима бла Камилла Алоева ётдюргендиле.

Къарчаланы Фатима жыйылгъанлагъа быйылны январындан башлап Россейни Юстиция министерствосуну «Коммерциялы болмагъан организацияланы ишлерини эсеплерин чыгъарыуну юсюнден» буйругъу кючюне киргенин эсгертгенди. Анга тийишлиликде эсеплеуню алгъыннгы ОН0001, ОН0002 эм башха тюрлюлери энди хайырланылмайдыла. Бусагъатдагъы излемлеге кёре,  эсепле энчи кабинетни юсю бла неда Юстиция министерствону порталында жангызда,  электрон халда алынадыла.

НКО не бла кюрешгенине, къайсы къауумгъа киргенине кёре электрон амал бла эсеплени жазгъанда толтурулургъа тийишли тизгинле кеслери алларына чыгъадыла. Энчи кабинетде уа аланы кезиу-кезиу, «черновикледе» сакълай, толтурургъа да жарайды.

Организациялагъа таплыкъгъа министерствону сайтында видеодерсле, ангылатыу статьяла  эм терк чыкъгъан соруулагъа жууапла да басмаланыпдыла.