Къыйын болумлагъа хазырланадыла

Битеуроссей команда-штаб юйрениулени бардырыу бла байламлы МЧС-ни регионда Баш управлениясыны кючлери энчи хазырлыкъда тургъандыла: къутхарыучула жыйылгъандыла, толтуруучу власть органлагъа, жер-жерли самоуправление органланы диспетчер бёлюмлерине бу ишни юсюнден билдирилгенди, ызы бла, дайым хазырлыкъда тургъан оператив штаб ачылып, аэромобиль къауум жыйышдырылгъанды.

Управленияны башчысыны орунбасары Аналаны Мухаммат белгилегенича, юйрениуле республикабызда чыгъарларына къоркъуу болгъан къыйын болумлагъа кёре къураладыла. «Аланы кезиулеринде авария-къутхарыу, ачыгъанлагъа болушуу, къыйын болум салгъан хатаны кетериу жаны бла амалларыбыз, кючлерибиз да жетери бла къаллыгъы тохташдырылады», - дегенди ол.

Анга кёре, къутхарыучула юйрениулени биринчи кюнюнде жаз башында, сакъ жауунла жаууп, суу басханда тиийшли мадарланы этгендиле. Эм алгъа, къыйын болумланы тыйыу эм ала салгъан хатаны кетериу жаны бла комиссияны жыйылыуу болгъанды, суу басхан жерде энчи низам кийирилгенди, болумну юсюнден жамауатха билдирилгенди. Мычымай, алайгъа ведомствону авария-къутхарыу бёлюмлери, терк медицина болушлукъ этген эм инженер службала жиберилгендиле. Бу ишлеге 386 адам къатышханды, ол санда МЧС-ден 184 къутхарыучу, 117 техника хайырланылгъанды.  

Юйрениулени экинчи кесегинде уа агъачлада эм аланы тийрелеринде жашау журтлагъа тюшген отну ёчюлтюрге керек эди. Анда штаб къуралгъанды, отну ёчюлтюу эм адамлагъа болушуу ишлени къыйын болумла жаны бла службаны, «Къабарты-Малкъар лесхоз» учрежденияны, Нальчик лесничествону, Табийгъат байлыкъла эмда экология министерствону, башха жууаплы службаланы келечилери тамамлагъандыла. Салыннган борчла тийишлисича толтурулгъандыла.